Tottenham Hotspur chuan manager atan Ange Postecoglou an lalut a, kum li contract an ziahpui.
Kum 57 mi hian Celtic-ah season hnih chhunga Scottish Premiership title vawi hnih a lak hnuah a chhuahsan a, season tharah club thar a enkawl tawh dawn.
Spurs in tuna Chelsea enkawl tur Mauricio Pochettino hnuaia UEFA Champions League final an khelh hnua manager nghet pali an neihna a ni a. Jose Mourinho, Nuno Espirito Santo leh Antonio Conte te hnung a zui.
Tottenham chairman Daniel Levy chuan, “Ange kan lalut hi kan phur hle. Khelmual chhungah football rang leh hmuhnawm kalpui thin a ni a. Player chher kawngah pawh hnuhma nei tha tak niin kan club tana pawimawh tak ni turin academy thlengin a tha zawngin nghawng a nei ang.” tiin a sawi.
Spurs hian March thla a Antonio Conte an chhuahtir hnuah manager nghet an melh char char a. Cristian Stellini hnuaiah lo awm lailawk in Ryan Mason hnuaiah an khel leh a ni.
Postecoglou hi Australian mi Premier League a hna thawh thei hmasa ber a ni a. Scotland-ah tun season-ah tualchhung treble champion niin Celtic-ah hian season hnih chhunga trophy lak theih paruk zinga panga a la.
Spurs hian manager tur an dap zingah hian Julian Nagelsmann, Luis Enrique, Arne Slot, Graham Potter, Julen Lopetegui, Rodgers leh Pochettino te ngaihven vekin inbiakna an neihpui vek.