French Open hmeichhe champion lai Iga Swiatek chuan nikum a final inkhel rematch a hmachhawn dawn a. Coco Gauff nen kumin quarter-final-ah an intum dawn.
Roland Garros-ah hian Swiatek hi a vawi thumna atan champion a tum mek a. Thawhtanni khan Lesia Tsurenko nen inkhelin set khatnaah 5-1 a hma a hruai laiin a khingpui hi inhliam avangin a inkhel zo thei lo.
A khingpui tur seeded number six hauhtu Gauff hian Anna Karolina Schmiedlova 7-5 6-2 in a hneh ve thung.
Kum 19 mi Gauff hian nikumah Paris-ah hian final khel thei mahse kuminah erawh a khelh tawh chinah beisei anga khelh loh a ngah a. Round hmasa lamah set hloh hnua hnehna chang tura beihlet a ngai leh thin.
An inkhel leh tur thlirlawkin, “Nikum lam ngaihtuah a tul tawh lo. Mahse he tournament bikah kher hi chuan kan inkhelh leh hun tur hi ka nghakhlel tawh hle.” tiin Gauff-i chuan a sawi.
Tunisian star Ons Jabeur pawhin a vawikhatna atan French Open quarter-final hi a khel dawn a, 6-3 6-1 in Bernarda Pera a hneh.
Jabeur hi nikum khan Wimbledon leh US Open final khel nimahsela Roland Garros-ah hian first round a pel thei lo.