Paris Saint-Germain chuan an head coach Christophe Galtier chu an ban a, a thlaktu tur nen inbiakna ngawrh takin an kalpui mek.
France lama chanchinbute chuan PSG a football advisor Luis Campos chuan Galtier hi Thawhlehni khan an thutlukna a hriattir tawh niin an sawi a. Club lam erawhin an la puang chiang lo.
Galtier hian Parc des Princes-ah hian season khat chauh hmangin tun season-ah Ligue 1 title lakpui mahse UEFA Champions League-ah round of 16 ah Bayern Munich hma a an tlawm avangin sawisel a hlawh viau.
Qatar Sports Investments hnuaia an awm hnuah PSG in manager nghet an neih pasarihna ni turin nikum nipui khan Galtier hi an lalut a. League lam thunun chhunzawm mahse star player rual an nei chungin Europe-ah hma an sawn lo chu sawi a hlawhna a ni.
April thla khan Galtier hian khelmual pawn lam kaihhnawih buaina a nei zeuh bawk a. Season tawp lamah point an hloh leh thin bawk avangin club hotute lam mit a tlung lo.
Bayern Munich coach hlui Julian Nagelsmann chu a thlaktu atan sawi a ni mek a, PSG hotute nen pawh inbiakna thui tak an nei tawh niin an sawi bawk a. Ani bakah French legend Thierry Henry chu a assistant manager ni tura sawi a ni bawk.