French striker Karim Benzema chuan Real Madrid a chhuahsan hnuah Saudi Arabia lam a pan a. Champion lai Al-Ittihad zawmin an hnenah kum hnih daih contract a ziak a, kum khat pawhsei theihna a awm.
Kum 35 mi Benzema hian kum 14 chhung a khelh tawhna Madrid-ah hian kum khat contract la nei mahse Los Blancos in chhuahtir an remti a. Blancos tan hian trophy 25 chawi tawhin goal 354 a khung tawh.
Saudi a pannaah hian a contract chungchang hi puanzar ni lo mahse kum khatah Euro maktaduai 100 a hlawh dawn a, Euro maktaduai 20 bonus dawng dawn bawkin inremna dang neuh neuh atangin lakluh a nei dawn bawk a. A contract a kum thum a hmang zo a nih chuan Euro maktaduai 350 vel hlawh thei tura ngaih a ni.
“He league hi hma a sawn a, player tha pawh an tam tawh. Cristiano Ronaldo a awm tawh a, hei hian Saudi Arabia in hma a sawn tih a tilang. Helaiah hian chak turin ka lo kal a, Europe ang thovin hetah pawh hian hlawhtlin ka duh.” tiin Benzema chuan a sawi.
Al-Ittihad hi Wolves leh Tottenham enkawl thin Nuno Espirito Santo hnuaiah an khel mek.