Manipur buaina avanga an sahimna zawnga Mizorama lut chu mi sing khat an tling tawh a, Mizoram atangin nitin mamawh te Manipurah hian phurh chhoh zel a ni.
Manipur atanga an sahimna zawnga lut Mizoram sorkarin nimin tlai dar 5 thlenga a chhinchhiah chu mi 10,091 an ni a. Aizawl-dist-ah 3,537; Champhai dist-ah 232; Kolasib dist-ah 3,558; Khawzawl dist-ah 64; Saitual dist-ah 2,440; Serchhip dist-ah 54; Mamit dist-ah 109; Lunglei dist-ah 63; Hnahthial dist-ah pariat; Siaha dist-ah 11 an ni.
Manipur atanga Mizorama an luhna pui ber pakhat, Tuivaiah hian Thawhtanni zing dar 6 atanga nimin zing dar 6 inkarah pawh mipa 447, hmeichhia 365, an vaiin 812 an lut a ni.
Hetih lai hian Tuivai lei kaltlang hian Mizoram atangin buhfai, oil leh ni tin mamawh pawh a lut ve zel a, niminah pawh hriat theih chinah tanker pathum lutin pahnihin petrol an phur a, pakhatin disel a phur bawk a ni.
Manipur buaina hian reh lam a pan mai dawn lo niin a lang a, Indegeneous Tribal Leaders Forum (ITLF) chuan Thawhlehni khan thuchhuah siamin Thawhlehni zing dar 7 khan Chandel dist-a Thingkangphaiah Assam Rifle-ten Area Domnination Patrol (ADP) neiin village defense volunteer-te nen an inkap a, mi pakhat thiin tam tak an hliam a, volunteer-te an inthiarfihlim hnuah Assam Rifle-te puitu Police Commando leh Meitei Terrorist pawlte chuan In te an hal leh ta vak niin an sawi.