Journalist puala Ministry of Cooperation hnuaia National Council for Cooperative Training (NCCT) buatsaihin nimin khan ram chhunga cooperative sector huanga sorkar laipuiin a hmachhawp leh a hmalakna hlawhtling mek chungchanga inhrilhhriatna leh inzirtirna neih a ni.
New Delhi-a SCOPE Covention Centre-ah National Level Workshop on New Initiatives/Shemes and Achievements for the Cooperative Sector hi NCCT Secretary Mohan Kumar Mishra-a’n a kaihruai a, Ministry of Cooperation Secretary Gyanesh Kumar chuan khuallian niin a hmanpui.
Workshop-ah hian sorkar laipuiin state hrang hranga cooperative society-te chu a bul thut atanga siam that tuma hma an lak dan te, an hmalak meknaa an hlawhtlipui dan te leh hmachhawp thar an neih te chu Minister of Cooperation leh National Cooperative Development Cooperation hotute leh mi thiamten kal khawmte chu thupui pakua hmangin an hrilh hriat bakah an zirtir nghal a. Zawhna leh chhanna hun hman thin a ni bawk.
Ministry of Cooperation hotuten an sawi danin sorkar laipui hian cooperative hnuaiah scheme hrang hrangteah hmachhawp tam tak an neih thu an sawi a. Chutih laiin, tuna cooperative society kalphungah siam that ngai tam tak a awm thu te, state sorkar thuneihna hnuaia society kalphungah tun aia langtlang zawk leh dan hnuaiah khauh zawka kalphung dik lo thlak a tul thu te, society member te hnena zirtirna tha zawk kalpui tura hmachhawp neih a nih thute an sawi a ni.
He huna tar lan a nih danin India rama district 765-ah Cooperative society – Primary Agricultural Credit Society (PACS) hnuaiah society 1,01,285 awmin member vbc 13 an awm a, Dairy Cooperative society-ah society 1,38,347 awmin, member 1.5 crore leh Fishery cooperative society hnuaiah society 24,912 awmin, member nuai 38 an awm bawk.
He huna tar lan a nih danin India rama state/UT 19-ah PACS/LAMPS hi state thuneihna hnuaiah dan anga kalpui a ni tawh a. Tun thla June atang hian Primary Agricultural Credit Society (PACS)/Large Sized Agricultural Multipurpose Society (LAMPS) ta state/UT 10-ah model bye-law kalpui ve tan tura tih niin, heng zingah Mizoram pawh hi a tel a ni.
Model byelaw hi PACS/LAMPS tan sumdawnna kawng hrang hrang 25 aia tam – heng dairy, fisheries, godowns, LPG/petrol/Diesel distribution, Common Service Centre (CSC) leh adangteah kalpui turin sorkar laipuiin a ruahman a ni.
He workshop-ah hian Mizoram atangin Malsawmdawngzela Hrahsel, News Editor, Vanglaini leh H Lalchhandama, News Editor, The Zozam Times te an tel.