Tleirawl mai a la ni a, kum ang zawng phei chuan kum 16 mi lek a la ni. Amberpet, Hyderaband-a cheng hian a nupui bank account a rut fai diak mai a, online game khelh nan a nu pawisa cheng nuai 36 zet chu a khawhralsak vek.
He tleirawl hian a pu mobile phone ah ‘Free Fire’ gaming app lar tak a khel thin a. Free game ni mah se, a khelh chhoh zel takah chuan a nu account atangin cheng 1,500 a hmanga ta. Hei hi a hmasa ber atan a ni.
A hnu ah game khelh chhunzawm zel duhin cheng singkhat chu a nu account atang bawkin a hmang ral leh.
Huna kal zel a, game a atchilh bur tawh vangin skills leh weapons lei tur chuan sum leh pai sen a lo ngai a, sum sen inhuam lo tan game awmze nei leh nuam tak khelh theih a nih loh vangin a chhungte hriat miah lovin game atchilhna chuan sum leh pai tam tak senralna turah a nawr lut a, a nu account atangin pawisa a hmang ta char char mai.
Free Fire game tan cheng Nuai 1.45 atangin nuai 2 thlengin a hmang ta. A hnu ah a nu hi SBI-ah kaltlangin pawisa lakchhah a tum a, mahse account-ah hian neih a lawi a lo nei tawh lo.
Bank official te chuan a account kaltlangin cheng nuai 27 a hmangral tawh tih an lo hrilh a, a hrilhhaiin, a ngaihna a hre lo hle. An hrilh zel danin, SBI account mai ni lo, account dang atang pawhin sum tam tak lakchhuah a la ni cheuh.
A fapa hian HDFC bank atangin sum tam tak a la chhuak bawk a, cheng nuai 9 lawih la chhuakin, a nu bank account pahnih atana sum a lakchhuah leh hmanral belhkhawm hi cheng nuai 36 a tling.
A nu mangang chuan cyber crime police station-ah thil awmdan a thlen na a, awmzia a nei chau hle. A fapa, pawl 11 zirlai hian a pa a chan tawh a, police official ni bawkin hah taka sum a lo thawhchhuah leh khawl tawh chu a fapa hian game khelh nan a hmangral fai ta vek mai a, chhungkua mangang takin an awm phah.