Manchester City in hun rei tak chhunga an lo nghah tawh chu an nghak chhuak ta a. Istanbul-ah Inter Milan hnehin a vawikhatna atan UEFA Champions League trophy an chawi a, tun season-ah treble champion an ni.
City hian Premier League leh FA Cup te an chawi avangin Manchester United in kum 1999 a an lo tih tawh ‘treble champion’ nihna chu an tawmpui ve ta a. Minute 68-naah Rodri goal khung tha tak chu chakpui in English club zinga ‘treble champion’ ni thei pahnihna chiah an ni.
A awlsam lo
Ataturk Stadium-ah City in tum pakhat chiah an nei. An hlawhtling lo a nih chuan trophy pahnih chawi tho mahse an tan season hlawhtlingah chhiar a har dawn. Tikhawp chuan Champions League trophy an nghakhlel.
An khingpuite lakah hian rinkai zawk nimahsela Inter Milan hi tun season-ah Champions League bikah an inrem nghet a, football fing khel ve tho an nih avangin a awlsam lo.
City in nidang an pha lova, Inter thiah harsa an ti. An phurrit belhchhah turin Kevin de Bruyne chu inhliam avangin first half-ah lakchhuah a ngai a. City tum angin thil a kal lo.
Amaherawhchu team tha chuan an that ber loh ni ah pawh an mamawh ang result an nei thin. Second half a Inter in beiseina an insiam chhoh lai takin City an che a, Manuel Akanji leh Bernardo Silva ten tlarhnung thiatin Inter defender te an talbuai zeuh. Helai tak hian Rodri-a’n remchang a la a, a huntha a hmaih lo. Chakna goal thun nan a tawk.
An hmahruaina a tawp thlenga hum turin City an tan erawh a ngai viau. Federico Dimarco chuan goal bar a tauh per a. An goalkeeper Ederson chuan Romelu Lukaku goal khung ngei tur hmaichhanah a dansak bawk.
Inkhel zawh lam
Manchester City manager Pep Guardiola chuan a vawi thumna atan Champions League trophy a chawi a. Club pahnih a ‘treble champion’ ni thei awmchhun a ni.
“Rim taka sual chhuakin chau mah ila lungawina in kan khat. He hlawhtlinna hi neih mai mai theih a ni lo.”
“Team tha an ni a, halftime-ah pawh dawhtheih kan mamawh thu ka naute ka hrilh nawn. Kan vannei tel a ngai bawk a, Ederson awm lo se draw thei kan ni.”
“Mahse tun tum chu kan tana ruat a ni a, he trophy hi kan ta a ni.” tiin Guardiola chuan a sawi.
Inter Milan boss Simone Inzaghi chuan, “Infiamnaah a tlawm zawk nih hi thil hreawm ber a ni. Mahse kan season hman tak kan chhuang viau tur a ni a, final a kan inkhel pawh a chhe lo. Team ropui kan hmachhawn a, tlawm phu zawk kan ni lo. Football-ah chuan hetiang hi a thleng thei a, hma kan sawnna tur a ni.” a ti a.
“Ka player te aia duhthlan tur hi ka hre lo, zaninah a chhan chiang takin khawvel in a hmu.” tiin a naute a fak ve bawk.