Aizawl : MNF party Adviser Lalruatkima’n nimin khan Awithangpa Hall, Kawnpui-ah, Tuirial West Block MNF conference a hmanpui a. Congress party mi 360, ZPM 162, BJP 5, MPC 5 leh neutral 119 an vaiin mi 651 MNF-ah a lawmlut niin MNF party thuchhuahin a tarlang.
MNF party Adviser, Minister ni bawk Lalruatkima chuan Zofate rorelna pakhat hnuaia awm chu MNF-in an nghahhlelh ber niin a sawi a. “Zofate’n hnam anga beih kan tawh lai hian Pu Zoramthanga anga leader ṭha Mizo hnam hian a nei lo” tiin, “Ramin ri nei mahse, hnamin ri a nei lo. Sakhaw intibing ten kan Biak In te thlengin an hal a, Missionary leh Pastor te chenna in thlengin an hal, tam tak min that bawk a, hmun hrang hranga awm Zofate ṭahna hi kan ṭahna a ni a, an mittui hi kan mittui a ni. An tan kan ding tlat zel dawn” Lalruatkima chuan a ti.
“Hnam tana silai lek ngam, martar tam tak awm tawhna Party, ramri humhalh tura silai hmetpuak ngam hi hnam chhan turin kan duap dui lovang,” a ti bawk.