Aizawl : Tlabung Sub-Division, Lunglei district huamchhunga dan lova khaw din (unauthorized villages) chungchanga hmalak tul te ngaihtuahin nimin khan Lunglei DC Conference Hall-ah Lunglei Additional DC Donny Lalruatsanga hovin a kaihhnawih mipawimawhte an thukhawm.
YMA, Khawthlangtuipui Group-in May ni 3, 2023 khan thuchhuah siamin an huamchhunga dan lova khaw din – Zohmun, Lare Veng, Letisury, Khojoysurychhuah, Bornasury, Chandobighat, Dursury, Saisen, Nak- uksora, Gurusora, New Balukiasury, Balukiasury chhuah leh Bandiasora a chengte chu June ni 14, 2023 hma ngeiin an parent village-ah let leh turin an hriattir a. Hemi chungchang hi Addl. DC hova thu- khawm hian an ngaihtuahho a ni.
Lunglei Addl. DC Donny Lalruatsanga chuan dan lova khaw din chungchang chu sorkarin a ngaihpawimawh thu sawiin, kum 2019 khan Joint Inspection Team (JIT) din niin, inspection chipchiar tak neih a nih thu leh Covid-19 hrileng avangin hma- lakna tihtawp lailawk a nih thu a sawi a. Hemi kawnga hmalakna hi uluk leh fimkhur taka kalpui zel a ngaih thu leh mihring dikna chanvo (human rights) bawhchhe lo zawnga kalpui a tul thu a sawi.
SDO (C) Tlabung kaihhruaina hnuaiah official-te leh Khawthlangtuipui Group YMA hruaitu ten heng unauthorized village te hi July ni 15, 2023 ral hma ngeiin tlawh chhuak leh vekin, an dinhmun te zirchiang se, a ti a. Department hrang hrangte chu un- authorized village-ah te hmasawnna hna leh scheme te lo kalpui lo tura hriattir an ni bawk.