May 22-a China-a Gansu province hmarthlang lama sorkar buatsaih km 100 intlansiakna an neih mek laia khaw vawtin a nan thut vanga intlansiaka tel mi 21 thihna thlenga mawhphurtute chu hrem an ni.
China chuan sorkar thuneitu 27-te chu thla hmasaa intlansiakna khirhkhan bik ultramarathon an buatsaihnaa thite chu an mawhphurna a ni tiin an chungah hremna lekkawh a nih thu sorkar enkawl People’s Daily chuan a tar lang.
Intihsiakna khirhkhan bik chia chhiatna thleng hi infiamna huanga chhiat tawhna rapthlak ber zingah a tel.
Intlansiakna bul an tanna hmun, Jingtai county-a an hotunu chu a hna atanga bân a ni.
Jingtai county huam chhung khawpui, Baiyin-a an mayor leh Communist party chief pawh thiam loh chantir zingah an tel a. Mi dangte pawh an nihna atanga tlakhniamtirte leh thunun theih tura vaukhan an ni.
Jingtai county party chief Li Zuobi chu June 9 khan a chenna inchhawng atanga tlain a thi a. Police-te chuan a thih chhan hi mi dang an inrawlh lo niin an ngai chungin an chhui mek a. A thih chhan hi ultramarathon nena inkaihhnawih a nih leh nih loh a chiang lo.
Ultramaration chhiat tawhna chhuitute chuan thli thaw nasa lutuk vang te, ruahsur nasa leh sik leh sa inthlak danglam thut vangin a tel thahnem tak bovin an zawn hnuah mi 21 lai thiin an hmu a ni.