Aizawl: Nimin kha Young Mizo Association (YMA) day vawi 88-na a ni a, Mizoram chhung leh pawna YMA branch-ten hlim takin an lawm.
YMA day hi Branch hrang hrangin an remchan dan angin an hmang a, branch tam tak chuan YMA Day-ah chauh ni lo, a hma atang tawhin an hmang tan a, an hnuaia section hrang hrang inelnate an buatsaih.
Nimin YMA Day-ah khan branch tam tak chuan zingkarah an khua leh an veng chhung tifaiin an hnatlang a, chhun lamah infiamna leh intihhlima hun an hmang tlangpui a, zanah vantlang inkhawm nei tur branch an awm bawk a ni.
Central YMA hruaitute chuan YMA branch hrang hrangah insem darhin YMA Day hi an hmanpui a, General Secretary Prof Lalnuntluanga chu Chawlhmun Branch YMA hun hmannaah a tel a, YMA chu Pathiana innghat, pawl thianghlim, politics rawngkai lo, mi tin huapzo pawl leh zonun zemawi tlawmngaihna lungphuma neitu a ni a, vantlang inzirna hmunpui, Zawlbuk aiawhtu a nih thu sawiin, YMA chu sorkar chhiat thata mawhphurtu, sawisel mai lova thurawn petu a nih thu a sawi.
Prof Lalnuntluanga chuan ram leh hnam humhalh nan zirna, thiamna leh finna kawngah nasa zawka ke pen a tul thu sawiin, sawi chhuak tam thei nih aia thawk chhuak tam nih tum thalai, YMA member ramin a mamawh thu te, ram chhana ding ngam, hnam chhana lu chhum ban chhum huam Mizoramin a mamawh a, dikna leh rinawmna nena chelh dinga, chawikangtu he ram hian a thlirin a zawng mek tih a sawi bawk.
Tun dinhmunah Central YMA hnuaiah YMA branch 820 awmin, Group 50 leh Sub headquarters pariat awmin, YMA member chu mipa 27,668 leh hmeichhia 1,97,183, an vaiin mi 4,73,872 an awm a ni.