Uganda khawthlang lama hel pawl, Islamic State group (IS) nena inzawmna neiten sikul an beihnaah zirlai 40 dawn an thi.
Hel pangate hian Zirtawpni zan dar 11:30 (India-a Inrinni zing dar 1:00) velah Mpondwe-a Lhubiriha secondary school hi an bei a ni.
Dormitory-ah an lut a, an kal a, chem nen mi an thah a, zirlaite hi hlau thabarin an awm tih thuneituten an sawi.
Democratic Republic of Congo-a inkulh, Allied Democratic Forces (ADF) chu he thil titua puh an ni a, zawn zui mek an ni.
Sikulah hian zirlai 60 chuang an awm a, an sikulah hian an riak nghal zel a ni.
Uganda-a information minister chuan zirlai 37 an thi tih a sawi a, an kum zat erawh a sawi lang lo.
An zinga 20 chu chem (machete) hmanga thah an ni a, 17 erawh an kang hlum niin Chris Baryomunsi-a hian BBC a hrilh.
Ugandan sipaite chuan helho hian sikul vengtu leh tual chhung mi pathum an that bawk tih an sawi.
A dam chhuakten an sawi dan chuan helho hian bomb-in dormitory hi an vawm phawt a, machete nen an bei zui ta niin an sawi a. Bomb-a vawm vangin sikul hi a kang em ni tih finfiahna a awm lo.
Zirlai paruk chu sikul kudam atanga an ruk chhuah ei tur keng turin an hruai nghal a. Ramri kânin DR Congo-ah an lut lehnghal niin minister chuan a sawi.
Ruang thenkhat chu a kang chhe hle a, DNA test hmanga tu nge an nih hriat ngai an ni hlawm tih a sawi bawk.
Hliam tuar zinga mi pariat chu dinhmun tha lo takah an awm mek bawk.
UN Secretary General Antonio Guterres chuan he thil thleng a dem tak zet thu leh a titute lakah dikna hlen chhuah a nih ngei tur thu a sawi.
Sipaiten ADF awmna, Africa-a national park upa leh lian ber, DR Congo-a Virunga national park an pan a, helho hi thah ve ngei an tum hle.