Centre for Environment and Social Justice (CESJ), Mizoram chuan Mizorama lui tui tibawlhhlawhtu chhui chhuah a niha dan anga an chunga action lak a nih theih chuan chief judicial magistrate hnenah chhui phalna an dil dawn.
Hemi chungchanga thuchhuah an siamah CESJ chuan Mizorama lui hrang hrangte mihring leh thlai, ran leh ramsa, lui nungchate tana ei tlak lo khawpa a nut chhan chu – National Highway & Infrastructure Development Corporation Limited (NHIDCL) kawng laiin dan loa an kawng laihna vung kawng thlanga an nawr liam vang a nih thu an sawi.
Aizawl khawpui chawmtu, Tlawng nut chhan pawh state sorkar hmalakna link road laihna leivung dan loa paih vang te, hmasawnna hna hrang hrang thawhna leivung leh bawlhhlawh paih vang te, in sakna hnawmhnawk bakah mi mal leh dawrkai bawlhhlawh a ruka lui kawr leh Tlawng fintu lui tea paih a nih vanga nu a nih thu an sawi a, furpuiah tui tamna a thleng mek a, mi tam takin tui an lei a ngaih phah tih an sawi.
CESJ chuan Mizorama luite chu mihring tihbawlhhlawh ngei a nih avangin a tibawlhhlawhtute chu tute nge an nih tih chhui chhuah a niha dan anga an chunga action lak a nih theih nan CJM-ah chhui phalna an dil dawn tih an sawi a, “Kan lui tui nu vanga tuartute tawrhna a nasat em avang leh a tuar mipui kan tam lutuk vangin min phalsak ngei ka beisei,” an ti.