- Ruata
Khawvel huapa electric hmang lirthei tha chungchuang siamtu Tesla chuan India rawn luh ve an tum tih a chiang ta a. Hei hi a neitu Elon Musk-a tawngkam ngei atang pawhin a hriat ta a ni.
PM in Elon Musk hmu
Tunhnaia India ram Prime Minister Narendra Modi-a’n USA a tlawh tum khan Tesla neitupa Elon Musk hi a hmu a. He inbiakna in a hrinchhuah te pawh a ni ang a, tunhnai mai khan Tesla chuan India rama investment tha tak an ti dawn tih an puang a, India rama electric lirthei hmingthang chho mek leh commercial lirthei lam thang nasa chu remchanga lain helamah hian hmalak an tum tih an tarlang a ni.
Elon Musk chuan India rama Tesla an rawn luh ngei dawn thu sawiin, “India ramah Tesla a lut dawn tih chiang takin ka sawi ngam a, theih anga hmaah luh kan tum dawn a ni,” a ti a. “Company lam chuan kan luh hun tur ngun takin a chhut a, a ngaihtuah mek a ni,” a ti. Elon Musk chuan India ram Prime Minister Pu Narendra Modi ngaisangtu a nih thu sawiin India ram hian khawvel ram lian tam tak te aiin hmalam hun eng tak a nei lehzual niin a sawi bawk.
A hma pawhin inbe fo tawh
Kan ram Prime Minister leh Elon Musk an inbiak hma daih pawh hian India rama sorkar official pawimawh bakah Minister te leh Tesla company hotu lian thenkhat te chuan inbiakna an lo nei fo tawh a. Hetah hian Tesla lirthei siamchhuah leh a battery siamchhuah te India rama tih ve a nih theih dan tur te sawiho thin a ni a. Company lam hian kumin kum tawp lamah hian India ram hi an rawn luh theih beisei a ni a, hei erawh chu company lam la ngaihchan zel a ngaih hmel a ni.
Tesla chu eng nge?
Tesla hi Tesla Motors tih hming puin kum 2003 July ni1 khan din a ni a. American multinational automotive leh clean energy company lian tak niin Austin, Texas-ah an hmunpui a awm a ni. Tesla hian electric hmang car leh truck changkang leh chak tha bawk si, changkang bawk si an siam mek a, a man pawh a to viau hlawm a ni. Hei mai bakah hian battery energy storage lam te, solar panel leh solar roof tile tha tak tak an siamchhuak bawk a, hei bakah hia product hrang hrang an siamchhuah bakah service hrang hrang an kalpui mek bawk a ni.
Tesla lirthei hrang hrang leh Indiaa kan hmuh tur
Tesla hian khawvel huapin car model pali (4) – Model 3, Model Y, Model X leh Model S te an tichhuak a. India rama tihchhuah tur hi official-a puanzar a la awm lo na a Tesla Model 3 electric sedan leh Model Y electric crossover te hi a nih beisei a ni a. Khawvel hmundanga chhuak mek Tesla model 3 hi single leh dual motor duhthlan tur awmin RWD (rear wheel drive) Standard Range Plus hian vawikhat charge-in km 423a tlan thleng thei a. 0-100kmph chu second 6-ah a tlan thei bawk a, dual motor Long Range AWD (all wheel drive) hian km 568 a tlan thei thung a, 0-100kmph chu second 4.5 lekah a tlan thei bawk a, a chakin a rang hle tih chu a hriat theih mai awm e. He lirthei hian top speed pawh a nei sang hle a, 260kmph vel lai a ni.
A man
Tesla lirtheite hi electric lirthei changkang leh man to a ni a. A nei pha te chu an intithei larh thin reng bawk a. Tesla Model 3 hi Rs. Nuai 60 chuang man a nih a beiseiawm a ni. Mizoramah hian nuai 100 dawn dawn man lirthei te pawh a awm ve ta nawlh nawlh mai a. India ram pum ang pawhin Tesla hi chu lei tur an tam viau a beiseiawm a. Mizoram tan chuan lirthei man to pawl leh mi nazawng neih theih a ni dawn lo na a khawvel company lar a nih avang leh India ram huap leh khawvel huap ang pawha lirthei lam kaihhnawih chanchinthar pawimawh a nih avangin kan han thailang ve a ni a. India ram tan chuan lirthei lam industry hmasawnna pawimawh tak a ni ngei dawn..