Beijing khawpui chuan kum 60 chuang zet hnua June thlaa khua a lum ber ni a tawng thar a, 41.1°C zet a ni tih Chinese weather authority chuan an sawi.
Chinese khawpui hian khaw lum uchuak tak a tuar rei ta hle a, June thla tawp thleng hi a la lum dawn niin an sawi bawk.
Ningani khan thuneitute chuan kum 1961 atanga an chhinchhiah china June thlaa a lum ber ni niin an sawi.
Kumina thla an hman liam tawh eng emaw zatah China hian thla khata a lum ber ni record an lo neih sa an khum fo tawh a, hei hian energy an hman pawh a tisang zual hle.
Thla hmasa khan an khawpui lian ber, khawchhak lam tuipui kama mi maktaduai 25 zet chenna, Shanghai-ah chuan May thlaa a lum ber ni an lo chhinchhiah an khum tawh bawk.
Beijing hi an ram hmar lama awm niin an khawpui ber a ni a, mi maktaduai 21 chuang an cheng a ni.
Ninganiah khan khawpui hmar lama an dah, weather station-ah chuan 41.8°C zeta lum niin a chhinchhiah a ni.
A hmain thuneituten khaw lum lutuk avang hian warning sang ber dawttu, orange alert an lo tichhuak tawh a, he alert hnuaiah hian khaw lum lam chu 39°C chung lam ni thei niin Inrinni thleng atan he inralrinna hi tihchhuah a ni.
National weather bureau pawhin kar hmasa khan heat stroke alert a tichhuak tawh bawk a, hei hi a hma kum eng emaw zat atanga en letin an tihchhuah hun aia chawlhkar hnih zeta hmaa an tichhuak a ni.
Beijing, Tianjin leh hmar leh khawchhak lama khawpui thuneitute chuan mipuite chu pawn lama hnathawh chi ti tam lo tur leh heat stroke anga an awm chuan damdawi thiamte ko vat zet turin an chah bawk.
Khawpui thenkhat chuan mipui leh sumdawngte chu an electric hman thunun deuh turin an ti bawk.
Kar hmasa khan National Energy Administration chuan China khawchhak lama a vawi khat nan emergency drill an nei hial a, hei hi nakinah rualkhaia power sem darh a tul hun leh power a awm loh thut pawha chet lak dan zirna atana an tih a ni.
Lawngchawlhna khawpui, Tianjin-ah chuan air-conditioner hman nasat a nih avangin power grid-a load chu nikum tun ang hun aiin 23% zetin a sang tawh a. Department-a thawktute pawh ni tin leiverhah patrol-in electric cable an zamten a nih dan tur ang takin hna an thawk em tih an vil reng bawk.