Aizawl: Sorkar laipuia Finance ministry-in SASCI Part-I 2023-24 hnuaiah Mizoram sorkar chu Rs. nuai 20,000 a pek belh dawn tih Union Finance Secretary-in Mizoram Minister Robert Romawia a hrilh.
Sorkar thuchhuahin a tar lan danin New Delhi-a cham mek, Robert Romawia Royte chuan Nilaini tlai khan Union Finance Secretary Dr. T.V. Somanathan chu a pisaah a kawm a, Union Finance Secretary chuan Mizoram Chief Minister Zoramthanga’n Union Finance Minister Nirmala Sitharaman hnena a rawt angin SASCI Part-I 2023-24 atangin Rs. nuai 20,000 ch Mizoram a pek belh tur thu hi a hrilh a, Robert-a chuan SASCI sum chu release rang turin a ngen a ni.
He an inkawmnaah hian Robert-a chuan Manipur buai vanga sahimna zawnga Mizorama raltlante dinhmun leh mamawhte a sawi bawk a, raltlante enkawlna tur sum chu home ministry-ah dilin an hotute pawh a lo dawr tawh thu te, chhawmdawlna tur sum chu scheme hranpa a neih loh avangin finance ministry-in ngaihhnathiamna home ministry-ah pe vat turin finance secretary hi a ngen.
Dr. T.V. Somanathan pawhin Home Ministry-in an rawt na ang chu pek vat an tum thu a sawi a. Minister Roberta chuan Union Home Secretary Ajay Bhalla pawh telephone-a be nghalin finance secretary-te thuchah chu a hrilh nghal.
DC&MA Minister ni bawk Robert-a hian nilaini tlai vek khan minority affairs ministry hotute kawmin Mizoram chu PMJVK scheme kalpui tha ber nia a hriat thu leh a hmuna hnathawh hrang hrangte endik turin a sawm a. Sum pek chhuah tur awm ang angte pe chhuak vat turin a ngen a ni.
Robert-a leh a tawiawmtu MLA pahnih, Dr. K. Pachhunga leh Er H.Lalzirliana te chuan Union Earth Science Minister Kiren Rijijju pawh kawmin Manipur buai chungchang hi an sawipui a, central sorkarin Mizoram raltlante tanpuina a pe mai lo chu pawi an tih thute hrilhin Manipur buaina chungchangah Prime Minister chu inrawlh vat tura an duhthu te an hrilh a, NE tana Union Minister a nih ang takin a theihna zawnah tan la turin an ngen bawk.