Centrally Sponsored Scheme hnuaia Mizoram sorkar hnathawkten an thilphut tihhlawhtlin phuta ni thum chhung badge dum an belin awmzia a neih loh avangin badge dum bel chhunzawm zela hnathawk lova lungawi lohna lantir chhunzawm an tum.
All Mizoram CSS Employee Co-ordination Committee huaihawtin CSS hnuaia thawkte chuan sorkarin an dinhmun zirchiang tura a din, Study Group rawtnate sorkarin a tihpuitlin lawk loh avanga lungawi lohna lantir nan leh an thil phutte tihlawhtling thuai tura sorkar kar nan Thawhlehni atanga nimin thlengin an hnathawhna hmunah badge dum an bel.
Nimin khan All Mizoram CSS Employee Co-ordination Committee hruaitute chu an kal zel dan tur relin an thukhawm a, lungawi lohna an lantir mekin rah tha a chhuah loh avangin Mizoram sorkar koh eih ngei theihna turin hreh tak chungin badge dum bel chhunzawm zel nise, an ti a; June 26-28, 2023 chhungin hnathawk lova lungawi lohna lantir chhunzawm an rel bawk.
Hemi chungchanga thuchhuah an siamah chuan CSS hnuaia thawk zawng zawng chu mi sing chuang an nih thu te, hmasawnna, hriselna, zirna leh naupang enkawlna hrang hrangte a huam tih sawiin, lungawi lohna an lantir avanga harsatna tawk an lo awm a nih pawhin mipuite hriatthiamna an dil nghal tih an sawi a; Mizoram sorkarin CSS hnuaia thawkte a hlamchhiah nia an hriat avanga hreh tak chunga lungawi lohna lantir an nih thu an sawi a ni.