Arsenal chuan Chelsea atangin Germany international forward Kai Havertz lalut turin Pound maktaduai 65 in inremna an nei.
Club pahnihte hian a man zat turah an inbiakrem theih avangin Gunners in player hi contract chungchang sawipuiin an dawr thei dawn a, medical neih hun tur pawh an tifel nghal thei ang.
Season liamta a Blues tana match 47 khel goal 9 khung Havertz-a man hi a inkhelh dan a zirin la sang thei a ni bawk.
Kum 2020 khan Chelsea hian kum 24 mi Havertz hi Bayer Leverkusen atangin Pound maktaduai 71 in an lalut a. Blues tan hian beisei angin che tha fo thin lo mahse 2021 Champions League final a Manchester City laka chakna goal khungtu a ni.
Arsenal in season thar UEFA Champions League atana an inbuatsaihnaah an squad tihchhah an tum a, hei vang hian Havertz hi an ngaihven.
West Ham United captain Declan Rice pawh an la ngaihven reng a, nimahsela Hammers in lei an dilna vawi hnih an hnawlsak tawh.
Hetihlai hian Chelsea in an squad tih thawl tumin hma an la zel a, player engemaw zat chhuahtir tawhin la chhuak tura ngaih an awm nual a. England midfielder Mason Mount pawh chhuak tura ngaih a la ni.