Ultimate Fighting Championship chuan Boston a inelna a buatsaih tur UFC 292-ah bout hmuhnawm ni tur dang a dah belh dawn a. Rob Font leh Song Yadong te an intum dawn.
August ni 20 a neih tur UFC 292-ah hian bantamweight huang a inhmachhawn turin Font leh Yadong te hian thuphungin UFC nen inremna an nei tawh a. Puanzar la ni lo mahse contract tihfel a ni thuai dawn a. Fighter pahnihte pawhin inbuatsaihna neih an tum tan tawh.
Boston khawdai a training nei thin, khaw thenawm Leominster a piang Font hi 20-6 MMA record nei a ni a. 135 pound huanga fighter hmuhnawm zing ami a ni.
A inlan hnuhnung pasarih atangin vawi nga a chak a, April thla khan a hnuhnung berah Adrian Yanez chu round khatnaah a knockout.
Kum 35 mi UFC bantamweight rankings-ah pasarihna a ni mek a, tunhnaia vawi hnih a tlawmna hi fighter tha Marlon “Chito” Vera leh legend Jose Aldo te lakah a ni.
A khingpui tur kum 25 mi Chinese fighter hi 20-7 record nei a ni ve thung.
Ani pawh hian April khan Ricky Simon chu technical knockout in a hneh a. UFC bantamweight rankings-ah pariatna ni mekin a inlan hnuhnung panga atang vawi li a chak a. Hnehna chang zawk tan 135 pound huang a dinhmun siamthatna huntha a inhawng dawn.