Mizorama lirthei dahna atana siam tawh zinga lian ber leh dawng hlawk ber tur, MINECO-a Multi Level Car Parking chu nimin khan Deputy Chief Minister Tawnluia’n a hawng.
Multi-Level Car Parking sakna tur hi kum 2017 khan Ministry of DoNER atangin Rs vaibelchhe 36.01 hmuh a ni a, state sorkarin a doletna Rs vaibelchhe 3.6 a thawh a. July 12, 2018 khan a lung phum a ni.
Helai hmun hi light motor vehicle 354 leh two wheeler 224 leng tura sak a ni a. Floor inkalpawhna atan hian stair case leh motorable ramp meter 6-a zau bakah lift dah tel a ni.
Hei bakah hian he building leh secretariat building kea kalpawhna atan pedestrian steel bridge siam tel a ni bawk.
Multi-Level Car Parking hi sorkarin a enkawltu tura a ruat, General Administration Department kutah hlan nghal a ni.
Lirthei dahna hmun hawngtu, Tawnluia chuan Multi Level Car Parking chu sorkar hmasain bul an lo tan a nih thu sawiin, hlamchhiah mai loin tihpuitlin nan tun sorkarin theihtawp a chhuah tih a sawi a, “Sorkar hmasa tih vanga hnual mai lova thil tha a nih avanga chhunzawm a ni,” a ti.
Tun hma chuan car parking pawimawhnate a awm meuh lo a, tun dinhmunah erawh khawpui a lo thang zel a, lirthei dahna leh parking hmun awl mamawhna a sang chho ta hle tih a sawi a, parking hawn tak chu mipuiin tangkai taka an hman a beisei thu a sawi bawk.