- DR. NGURNUNZAMI SAILO
THAW HAH
- Thawkna dâwt hnawh avanga thaw hah : Hnar aTanga chuap thlenga boruak kalkawnga hnawhtu a awm reng reng hian thaw a hah thin a. Chaw lemsual avang te, taksa huatzawng hipluh avang te, asthma vei avangte hian a awm tlangpui.
- Chuap vanga thaw hah: Pneumonia vangin a tam hle a, chuap lam natna Chronic Obst ruct ive Pulmonary Disease an tih mai vangte hian a tam hle.
- Lung vanga thaw hah: Lung chak loah hian thaw hah hi a tam hle a, a tirah chuan hna hahthlak thawh chauhin a awm thin a, lung chu a lo chak loh chhoh zel chuan awm mai mai pawhin thaw a hah thin.
- Dawldanna avanga thaw hah: Dawldanna reng reng reng a awm hian taksa thisenin boruak (O2) a keng tam thei lo va, taksa a thawhrim viau chuan thisenah boruak a kal tam theih loh avangin tihrawlte chuan kham khawp an hmu lo va, boruak tam zawk hipluh tumin an thaw nghek nghek ta thin a ni.
- Zam lutuk emaw thil huphurh tak kan hmachhawnte hian thaw hi amahin a lo rang ve mai thin a ni.
KHUH :
Kan taksaa ka atanga thil duhawm lo a lo luh hian a paih chhuah nan kan khuh thin a, heng thil lo lut hian kan hrawk a tiza a, mi hrisel pangngai chu kan khuh thin a ni.
Boruak kalna kawng hi pipe ang mai hi a ni a, timur tam takin a siam a ni a, he dawt te hian a huatzawng thil lo lut a awm vaih chuan mihring chu a khuhtir ta thin a ni. Meikhu te, boruak hrisel lote pawh a hre thei vek a ni.
Tin, natna chi hrang hrang vangin a awm thei bawk a, a lar zual chauh lo tarlang ila, chungte chu :- hritlang, awm na, bronchitis, laryngitis te an ni.
Khuh hi chuap natna chi hrang hrangah a awm ve bawk thin a, chungte chu pneumonia, TB, emphysema, cancer etc. Chuap cancer chi khat bronchogenic carcinoma an tih maiah hi chuan khuh leh khak thi hi a nasa zual a ni. Lungphu chawl kan tih maiah pawh hian khuh hi a awm ve thei bawk, thisenzam peng lian tak pakhat thoracic aorta an tih mai piansualna awmin thawkna dawt a nekchep hian khuh a tel thei bawk a ni.
(Chhunzawm tur)