Mizoram politics chuan inthlan lam kan hawi nasa ta hle mai. Party tin an in singsa hulh hulh a. Lawmluh leh chhuak tih vel thawm chuan kan social media a luah khat leh ta a ni ber mai. Media atanga a lan dan chuan Mizoram mipui hi Lutchhuaka te nimai awm hian kan lang a. Kawng lehlam atanga thlir chuan a zahthlak te pawh a tih theih hial awm e. Inthlan dawna politics inlet kual vel ringawt hian ram hmasawn leh ropui min thlen ang em tih hi kan inzawhna ni sela.
Inthlan dawn lo ah kha chuan ram hmasawnna tha pui pui kan sawi a. Sustainable development chi hrang hrang pawhin kan media a luah a. Mipui pawhin kan thlirna a ziaawm viau. Mahse, inthlan boruak lo hnai chho tur hi kan la zo lo deuh em ni aw tih theih a ni hial mai. Chumi khami chu chumi bialah chuan a ding dawn, chumi bialah chuan chuti zat an lawm lut leh ta tih vel hian min ti â vek emaw tih tur a ni.
Heng zawng zawng hi engnge a tobul ti ila, i he lova kan kawh tur chu kan politician te an ni. Mipui hi chu hruaitute hruaina lama thle tawn mai mai kan ni a. Kan hotuten an sawi ang chu sawichhawngin kan inthlemin kan innawr tawn mai mai a ni. Ram hmasawnna tak tak hi miin vei mahsela a boruakah mipui hi tih âta kan awm chuan eng thu tak mah a sawi theih tawh thin lova. He inkaihhruaina hnuai atanga kan talchhuah hi kan zoram mamawh ber ni ta in a lang.
Kan poltician te hian kan ram kaihhruai an tum dan hi tun aia chiang hian min zirtir thei lo em ni aw? India ram ngeiah pawh hian ram kaihhruai an tum dan hi mipui mamawh zirchiang hmasa a, zirtirna dik pe a, data fel tak nena power point presentation nena che thlap thlap thei hruaitu state hrang hrangah an awm tawh. Sawrkarna an lo chelh thei anih chuan an kumkhatnaa an tih tur, a kum hnihna a an tih tur….chutiangin kum 5 a lo rala an thlen chin turte min kawhhmuh thei party hruaitu kan va mamawh tawh em. Mithiam kan mamawh kan ti a, party a lut tura mi thlem kual vel ringawt hian mithiam engnge an tangkaina? Kan politiciante campaign danah pawh hian bung thar i kai mawlh ang u. Chu chuan ram hmasawnnate, mipuiin inthlan campaign boruak an thlir dante, an titi vawrh dante pawh a thlak ngei beisei bawk ila. Ram thar kai i tum ang u.