Ningani khan Biden-a hian Indian hruaitu hi White House South Lawn-ah a dawngsawngin a lawm a, he hunah hian mipui lo awmte chu ‘Modi, Modi, Modi’ tiin an au nasa hle a, military band-in ram pahnih hnam hla pawh tiri bawk.
Nilaini khan Modi-a hian New York-a United Nations hmunpuiah Yoga event a hmanpui bawk.
Washington-a hruaitu pahnihte inkawmnaah ram hnihte karah nakin zelah inkungkaihna nghet tak a awm a tul thu an sawi a,Indo Pacific boruak pawh sawiin China lian mek zel chungchang pawh an sawi.
Biden-a chuan ram pahnihte inkungkaihna chu “kum zabi 21-naa inkungkaihna sawi fiahna’ a la nih tur thu a sawi.
Modi-a hian Hindi-a thu a sawinaah US a tlawh chu ‘Indian vaibelchhe 1.4-te tan chawimawina leh zahawmna’ a nih thu a sawi a, ‘khawvel kalphung chuan nih dan thar a nei mek zel’ tih a sawi bawk.
Hemi hnuah hian Oval Office-ah an inkawm zui a, sumdawnna, mamawh inpek tawnna ngialnghet zawk neih dan tur, technology lama hmasawnna tur, sik leh sa inthlak leh ram venhimna thil hrang hrangte an sawi dun.
“Indo Pacific muanna leh himna hi kan ngaih pawimawh dun a ni,” tiin Modi-a hian thuthar lakhawmtute hnenah a sawi a. “Heng lai hmun hmasawn leh hlawhtlinna hi khawvel pum tana pawimawh a ni,” a ti.
Modi hian kum 2014-a prime minister a nih hnuah US a tlawh vawi ngana a ni tawh a, tun tuma a tlawh erawh mi thiamte chuan thil hrang hrang nghawng thei niin an ngai a, Biden-a sorkarin eng ang chiahin nge India hi nakin zela thawhpui atana a thlir dan tilangtu niin an ngai bawk.
Washington, DC hian Biden-a’n ro a rel hnuah Modi-a chiah hi dawnsawnna ropui tak, state dinner leh Congress-a thu sawitir ang chi an la tihtir niin Al Jazeera chuan a tar lang.
South Korean President Yoon Suk-yeol-a’n April-a a tlawh tum khan Biden-a hian China nena an inkarah an lam a tang tih chauh a hrilh.
French President Emmanuel Macron pawhin nikum Devember-a Washington a tlawh khan Congress-ah thu a sawi lo.
Lo lawm viau anga an lan lai hian Biden-a telna, Democratic Party atanga rorel khawl member 75 zet chuan Biden-a sorkar hian Modi-a hi an rama mihring dikna chanvo palzut a ni thin chungchangah lo nawr turin an la ti reng a. Democrat lawk pathum – US Representatives Alexandria Ocasio-Cortez, Ilhan Omar leh Rashida Tlaib te phei chuan Modi-a’n Congress-a thu a sawi hi an boycott hial.