MNF party chuan an president, chief minister Zoramthanga chu thawk rim, taima, nationaist leh hmathlir nei tha a nih avanga an chhuan thu an sawi.
Inrinni khan Aizawl Press Club-ah MNF Media & Publicity Department-in thu thar thehdarhtute an kawm a. An General Secretary VL Krosshnehzova chuan mi thenkhatin hnathawk mang lo leh engmah ti lo ang hialah MNF sorkar an chhuah fo tih sawiin, “Kan Chief Minister Pu Zoramthanga kaihhruaina hnuaiah hian hripui rapthlak tak leng leh harsatna hrang hrangin min tlakbuak karah nasa takin he sorkar hian hmasawnna hna a thawk mek zel,” tih sawiin, MNF sorkar chu mahni thiltih that puan chhuah leh infak lam uar lo tak, mipuite tana ngawi renga hnathawk mawlh mawlh mai thin an nih avangin party thenkhatin hnathawk mang lo anga sorkar an puhna hi awih tawk an lo awm thin niin a sawi.
VL Krosshnehzova chuan Mizoram Chief Minister hmalakna avang liau liauin Union Budget-ah Aizawl Bypass Road Rs vbc 500 leh Bamboo Link Road Rs vbc 100 dah a nih thu leh, Union budget-a Mizoram hming a hranpa meuha a lang chu Chief Minister hmalakna liau liau a nih thu a sawi.
Tunah hian leiverh lian tham tak km 2.40 a thui, Sairang chhak Kurung lui kanin Rangvamual epah Bawngkawn Brigade ruam atanga Muthi ruam, Tuirial Airfield atanga Seling thlen hmaa chhuak turin buaipui mek a nih thu a sawi a. Kawng siamtu tur pawh tender tawh niin tunnel bik hi DPR final tep a ni tawh thu a sawi bawk.
VL Krosshnehzova chuan SEDP, PMGSY, SASCE, SASCI, NABARD, CRIF, NEC, World Bank leh Asian Development Bank fund hmangin Rs vbc 50 chung lam hnathawh paruk a awm tawh thu te, kawng siam thawh zawh tawh paruk a awm thu te leh PWD enkawlna hnuaiah building rotling tham 78 chuang sak zawh tawh a nih thu a sawi.
He’ng bakah hian SASCI hnuaia Agriculture link road km 47 laih a nih tawh thu te, khelmual 25 laih mek leh laih zawh tawh a awm thu te, futsal ground pariat siam a nih tawh bakah Volleyball/Basketball court 13 siam niin, women centre, market shed, community centre 28 sak zawh tawh thu te, vantlang inthiarna leh waiting shed pawh 64 siam a nih tawh thu leh lei (bridge) 17 dawh mek leh dawh zawh tawh a awm thu a sawi bawk.
MNF Media & Publicity Department GS chuan, kum 2000 tira Peace Bonus Rs 182.50 crs Non Plan head-a finance ministry atangin CM Zoramthanga’n a sawichhuakte kha thil mak a nih thu an sawi a. Tunhnai maiah pawh SASCI Part I 2023 – 2024 hnuaiah Chief Minister ngennain, Union Finance Secretary chuan cheng nuai 20,000 Mizoram pek belh a nih tur thu, Robert Romawia Royte Minister hnenah a lo sawi bawk niin an sawi.
“PWD Minister ni a nasa taka hma a lak avangin, kan Chief Minister Pu Zoramthanga zarah Zoram dung leh vangah kawng tha kan nei ta mek hi a lawmawm tak zet a. Inkalpawhna kawng lo tha tak avang hian mipuiin awlsamna nasa tak kan neih bakah sum leh tha kan hum nasa hle a ni,” aVL Krosshnehzova’n a ti.