Aizawl: Tripura a inbengbel tawh, Mizoram electoral roll-a la chuang Bru vote neite hming paih hna chu chak taka kalpui a ni dawn.
Election department hotute hnen atanga thudawn danin kumin kum tawp lama assembly inthlanpui buatsaih a nih hma ngeiin Mizoram electoral roll-a la awm Bru vote neite hming hi paih zo hman vek tura tanlak a ni.
Hemi chungchangah hian tunhnaiah inhmuhkhawmna buatsaih a ni a. Mamit, Kolasib leh Lunglei bawrhsap, district election officer (DEO) nihna chelh bawkte chu chak taka vote paih hna thawk tura hriattir an ni.
Hemi hma hian DEO-te chuan Tripura relief camp a awm Bru vote neite kha a hranpa a dah lova electoral roll pui a thun phawt an rawt a. Mahse, hei hian Mizoram electoral roll a hming la chuang Bru vote neite hming paih hna a tikhawtlai thei dawn a hria-in, chutiang a ti lo chuan an district electoral roll a la chuangte hming chu paih nghal hmiah hmiah mai tura hriattir an ni.
Tun dinhmunah hian Tripura a inbengbel tawh Bru vote nei mi 4,554 chu Mizoram electoral roll atanga paih a ni tawh a. La paih loh hi vote nei mi 5,000 chuang an la awm.
Tripura State Election Commission lamin Bru vote neite an thun ţeuh tawh laiin an hming lo paih tura ERONet kaltlanga Mizoram election department an rawn ngenna hi a kal muang em em a. Chutiang a nih avang chuan Chief Electoral Officer tharin a hna a zawm hnu hian paih hmiah hmiah mai tura thutlukna hi siam a ni ta a ni.