Congress party chuan MNF sorkarin kum 2018 inthlan dawna an thutiam zawng zawngte chu an tihlawhtling thei dawn lo tih a chiang tawh niin an sawi.
Inrinnia Aizawl Press Club-a thuthar thehdarhtute kawmin Congress party thupuangtu, Dr Lallianchhunga chuan August 20, 2018-a Mizo Hnam Rûnah MNF President Zoramthanga’n a thusawinaah MNF an sorkar chuan vai buhfai an rin tawh loh tur thu leh Mizo buh an rin zawk tawh tur thu a sawi chu, vawiin thlengin a la hlawhtling lo tih a sawi.
“Mizoram mipuiten vai buh la ringin sorkar pawhin ration atan vai buhfai a la supply ta zel a ni,” a ti.
Dr Lallianchhunga chuan October 17, 2018-a Aizawl East II MNF Workers’ Meet a hmanpuinaah MNF President Zoramthanga hian sorkarna an chan chuan Aizawl khawpui chu motor parking-a harsatna awm lo, traffic jam awm lohna state capital awm chhunah an siam dawn nia a lo sawi tawh chu thuneihna an chan atanga kum nga a liam dawn tawh hnuah pawh Aizawl khawpui chu ninawm khawpin nileng deuhthawin traffic a la jam reng a. Nuai sang chuang an sen ral tawhna PAHOSS hmang pawhin traffic jam awm lohna siam chu sawi loh, traffic a la jam reng zawk niin a sawi.
MPCC Media & publicity Chairman Dr Lallianchhunga chuan MNF sorkarin an sorkar tawpna kum an hmang mek chungin kawng chhawng siamna tur DPR an lo la siam lo tih February 27, 2023 assembly zawhna leh chhanna atangin a lang tih a sawi a. Kawng chhawng siam a nih tur thu leh kum 2018 inthlan dawna Zonet-in inthlanpui thlirlawkna a buatsaihah Zoramthanga hian a sawi a. Hei mai bakah June 6, 2013 daih tawh khan Aizawl South II MNF Block Conference, Kulikawn YMA Hall-a neih a hmanpuinaah pawh a lo sawi tawh tih sawiin, “Hemi tum pawh hian kawng chhawng siam chu an ngai pawimawh hle a. ‘Kulikawn atanga Chanmari inkar hi target hmasak kan tum ang,’ tiin a lo sawi tawh bawk. Hetiang a ni chung hian hmalakna pawh an la nei lo a ni,” a ti.
Dr Lallianchhunga chuan MNF hian an Flagship Programme SEDP-ah cheng nuai thum pek mipui min tiam avangin kum 2018-ah MNF chu hneh taka thlan tlin an ni tih a sawi a. ‘NLUP dawng tawh zawng zawng pawhin in dawng vek ang…,’ ti hial khawpin Zoramthanga’n sawi mah se, kum ng chhungin chhungkaw 60,000 tan Rs. 50,000 chauh an ruahman a, hei pawh hi tum hnih, Rs.25,000 ve vein an pe thei tawk niin a sawi.
MNF sorkarin heng an thu tiam zinga langsar zual kum nga chhunga an tihhlawhtlin theih lohte atang hian an sorkar chhung zawngin zeldin thu leh insawi hlim chawpin hun an hmang tluan zak tih sawiin, “Hetianga ram mipui an zahna leh an pawisak loh zia thlir hian Mizoramin anmahni avanga harsatna kan tawh zel lohna tur leh kan ram, kan hnam, kan sakhua a him zel nan central-a BJP sorkar thawhpuitu MNF sorkar hi hnawl turin Mizoram mipui kan sawmin kan ngen a ni,” Dr Lallianchhunga’n a ti.