February 1, 2021-a sipaiten mipui rorelna paih thlaa Myanmar-a thuneihna an chan atanga khawchhak lam, Thai nena an inrina bawra inbeihna kal zelah tukin khan Karen helho chuan army outpost beihin inkahna a thleng nasa hle.
Association of Southeast Asian Nations (ASEAN) summit neih zawh takah member ramten sipai sorkar duh lohna lantirtute laka an chet dan thlak tura general-te an ngen hnu lawka thleng a ni.
Karen National Union chuan an sipaitenThailand nena an inrina bul lawk chu tukin khawvar hma khan beiin Myanmar army chu an la niin an sawi.
Camp hi an luah a, an hmunte an halsak bawk niin an pawla foreign affairs hotupa, Saw Taw Nee chuan Reuters news agency a hrilh a. Hmun dangah pawh inbeihna a awm a; mahse, a sawi chiang lo thung.
Ram pahnih inrina, Salween River lui bul hnaia chengte pawhin silai puak ri an hriat thu leh ramngawin a bawh tlak vela meikhu chhuakte pawh social media-ah a thlalak leh video an tar lang hlawm.
Thailand hmarthlang lam, Mae Hong Son khuaa sorkar hotu pakhat pawhin, “Kan epa Myanmar ram china Myanmar army outpost-ah inkap thawm a awm,” tiin Reuters a hrilh a. “Venhim hna thawktute pawh ngaihven tura hrilh an ni a; mahse, Thai lam chinah chuan engmah a thleng lo,” a ti.
Thai lamah hian mi pakhat na vak lova inhliam a awm ve bawk nia sawi a ni bawk.
Myanmar sipai, Tatmadaw an tihte chuan he thil thleng chungchang hi engmah an la sawi ve lo thung.
February 1-a sipaiten mipui rorelna an paih thlak hnu khan hmun hrang hrangah sipai duh lohna lantir a ni a, khawchhak lam, Thai nena inrina vela hnam tlem zawkte din hel pawl pawh sipai laka a che na ber pawl an ni hlawm.
Sipaite hian an rama mihring maktaduai 53 zet chengte inpumkhata lungrual taka an chenho theihna tur chuan an tha ber niin an insawi ve thung.
An ram mipui leh hel pawl hrang hrangin sipaite an beih let mek lai hian Inrinnia neih tak, ASEAN summit-ah sipai lal, Min Aung Hlaing telin an member-puite chuan anmahni duh lotute laka tharum an thawh titawp turin an ti a, hemi hnuah hian boruak a dai rih hle.
Sipaite hian anmahni duh lotu civil mi 753 an thah tawh niin Assistance Association for Political Prisoners chuan a sawi a, sang chuang an la man mek bawk.
Tatmadaw-in Thailand nena inrinaa helho a bomb avangin mi 3,000 chuan an thenawmah hian an tlanchhia a. Mi 40,000 chuang chenna in nei lo an awm tawh bawk niin UN chuan a sawi.