Arsenal chuan kum 20 chhunga a vawi khat nan Champions League final an lut leh ta a, Bukayo Saka goal khung chu Gunners-in vawi hnih inkhelha 2-1-a Atletico Madrid an hneh theih nan a tawk.
Mikel Arteta-a naute hi season hmasa khan semi-final-ah a tawpah hnehna changtu, Paris St-Germain lakah an tlawm a; mahse, Saka goal khung hmang hian tun season-ah chuan Champions League leh Premier League-a nomawi la kawp thei dinhmunah an ding ve ta thung.
Spain-a inkhelh hmasakah khan 1-1-in an inhnehtawk a, Thawhlehni zana Emirates Stadium-a an kir lehna inkhelah hian an fimkhur dun hle a, a tir lamah chance tha an siam lo ve ve.
Saka hian minute 44-naah Leandro Trossard-a pet chu Jan Oblak-a’n lo dang perin goal-ah a khung a. Goal an thun theih nana pawimawh tak chu Viktor Gyokeres-a a ni a, ani hian tha taka a ball lak luh kal zel chu goal hmangin a hmawr an bawk a ni.
Atletico hian hun remchang eng emaw zat an nei ve tho a, Declan Rice chuan first half-ah Giuliano Simeone-a chu a hlauhawm hmanin a chuh buai hman hlauh va. Hemi hma hian Gabriel-a pawhin tha takin a dang a, chawlhlawk hnuah Simeone-a bawkin hun tha neiin David Raya chuan a dansak hram a, Arsenal an him hram.
Gyokeres chuan Arsenal-in hma an hruaina chu belhchhah theihna hun tha a hmu a. Substitute Piero Hincapie-a vawrh luh chu box chhung atang goal kham chungah chiah striker hian a thlawh hlauh.
Hun tha bawlhpelh zauh zauh mah se Gunners hian kum 2006-a Barcelona an hneh loh hnua Champions League final hmasa ber khelh theihna tur hun an nei leh ta tho a ni.
May 30 hian Budapest-ah Bayern Munich emaw, PSG emaw an hmachhawn dawn a, a vawi khat nan nomawi lak theihna hun an nei ang.
Tun season-a Arsenal-in an ngaihven ber chu kum 22 chhung league nomawi an lo nghah tawhna tihhlawhtlin tumnaah a ni a, Europe-a hneh loh nei lova la kaltluangin zelin nomawi pahnih an thlir ta mek.
Champions League league phase-a pakhatna ni thei, Gunners hian tun season-ah hian final an luh theihna kawngah Bayern Munich, Inter Milan, Sporting leh Atletico (vawi hnih) te an hneh tawh.
Arsenal hian tun season-a an chet that ber zinga pakhat chu Inrinni zana Fulham 3-0-a an hneh tum khan an pho lang a, Arteta hian tun Thawhlehni zan inkhelah pawh a team a siksawi danglam tam lo hle a, tha takin an khel a tih theih.
Gunners boss hian huaisen takin kum 19 mi chauh, Myles Lewis-Skelly-a chu midfield-ah a awm chhunzawmtir a, senior team tana a bul tan vawi hnihna chauh ni mah se fak phuin a khel.
Lewis-Skelly hian hmun chep tak takah ball a keng ngam a, Arsenal midfield-ah ball a thunun thei a, Rice nen tha takin an thawh dun thei.
Arsenal player-te khelh that zan a ni a, left back Ben White-a pawh hian tun hnai chawlhkar eng emaw zat chhung khan hun harsa tak tak tawngin khelh fuh loh a nei nual a; mahse, a fitness a tha leh tawh a, a khelhna hmunah chuan a tha ber a ni tih a inlantir leh.
Saka goal khungnaah hian Gyokeres pawh hi sawi hmaih theih a ni lo va, forward hian Atletico centre-back-te a tlan pelh hnuah a vawrh luh kal zelah goal an thun a, lehlam tlarhnung tan a hlauhawm tluan zak bawk.
Premier League hmahruaitu, Arsenal hi European nomawi ngaihhlut ber nen nomawi pahnih la turin inkhel vawi li chiah chak an mamawh ta a ni.