India ram laili, Madhya Pradesh-a mipa pakhat chu vantlang hmuhah tribal hna thawk a zun khum avangin man a ni.
Pravesh Shukla-a hi Scheduled Castes and Scheduled Tribes (Prevention of Atrocities) Act hmanga man niin he dan hi hnam hnufual zawkte nekchep an nihna lak atanga venna a ni.
Social media-a mipa pakhat a zun khum lai video nasa taka a darh hnuah man a ni a. A chet dan hian ram pum titi a luah a ni.
Shukla hian man a nih leh a chet danah hian engmah sawi a la nei lo.
Eptu party lian, Congress hruaitu thenkhat chuan amah hi rorel lai, BJP mi leh sa niin an sawi a, he party hi Madhya Pradesh-ah pawh rorel lai an ni a; mahse, BJP chuan an pha.
Police chuan he thilah hian engmah sawi an la nei lo va, thil thleng chu ‘chhui chian phawt’ a la ngai niin an sawi.
India-ah hian hnam hnufual zawkte humna leh venna dan hi awm reng mah se ni tin an laka hmuhsitna lam hawia chetna hi a thleng reng a. Tribal hi mi maktaduai 200 vel an awm a ni.
Sakhaw zuitu ngah ber, Hindu-ah hian chi san dan indawt thliar a ni a, hetah hian a hniam bera awm hnamte hi dah hnuai an ni viau zel.
Thawhlehnia darh video-a a lan dan chuan Shukla hian meizial zu chungin kawngpui sirah mipa pakhat a zun khum a, hetih lai hian a rui nia sawi a ni.
A clip hi nasa taka thehdarh zui a ni a, mi tam takin man ngei an phut thu an sawi hlawm.
Chief minister hlui, Kamal Nath chuan, “He thil hian Madhya Pradesh pum hi a tizak a. A titu hi na thei ang bera hrem leh Madhya Pradesh-a tribal mite laka hetianga chetna hi tihtawp ngei a ngai a ni,” tiin Twitter-ah a tar lang.
Chief Minister Shivraj Singh Chouhan pawhin a thinrim thu leh a titu lakah dan khauh tak, National Security Act (NSA) lek turin thuneitute a ti nghal.
Hetih lai hian Congress thupuangtu, Abbas Hafeez chuan Shukla hi BJP MP, Kedarnath Shukla thuihhruai niin a sawi a. An pahniha thla an lak dun pawh a tilang.
Shukla hian engmah a la sawi lo va, a pa, Ramakant erawh chuan a fapa hi ‘BJP MLA hnaihtu a nih avangin’ eptuten an bei nia a sawi.
“Chiang taka chhuia dikna hlen chhuah a nih ngei ka beisei a ni,” tiin a sawi niin tual chhung chanchinbute chuan an tar lang hlawm.
Kedarnath Shukla erawh chuan Congress sawi dan hi phain engtiangin nge BJP a nih leh amah nen an inhnimhnai anga sawina chu a lo chhuah tih a hriat thiam phak loh thu a sawi.