Thawhtanni khan khawvel pum lum lam chawhrual chuan 17°C a kai a, hei hi chhinchhiahna a awm china a lum ber tum a ni.
Scientist-te chuan kum zabi 19-na tawp lam atangin khaw lum leh vawh lam tehna a awm tan a, hemi hnuah hian tun aia a lum ni a la awm ngai lo tih an sawi.
Tun hnaia khua a lum em em chhan hi El Niño vang leh khawvelin carbon dioxide a tihchhuah tam lutuk vang a ni.
Zirtute chuan El Niño hi a chak zel dawn avangin hun rei vak lo kal leh tur chhung hian lum ber record thar a awm zui an la ring bawk.
Kumin kum a thar tirh atang tawh khan zirchiangtute chuan khawmual leh tuipui a lum chak lutuk chu ngaihvenin lum record hi a thlen theih an lo ring lawk sa tawh.
Spain leh Asia ram eng emaw zatah tuipui lum avanga khaw lum uchuak tak tak a awm a, tuipuiah pawh North Sea vel chu a lum hle bawk.
Tun karah pawh China-ah chuan khaw lum tak tak tawngin hmun thenkhat chu 35°C chung lam a ni a, US chhim lam pawh a lum hle bawk.
Hetiang a nih avang hian Thawhtanni khan khawvel pum lum lam chawhrual chu 17.01°C a tling ta niin US National Centers for Environmental Prediction chuan a tar lang.
Hemi hmaa khawvel lum ber tum chu August, 2016 kha niin 16.92°C a lo ni tawh.
Thawhtannia khawvel dinhmun hi thlalem hmanga khawvel lum lam an vil tan, kum 1979 hnua a lum ber tum a ni a. Mi thiamte chuan kum zabi 19-na tawp lama hmanraw dang hmanga an teh tan atang pawhin a lum ber tum a ni tho niin an sawi.
Antarctica-ah pawh July a lum ber tum chu khum a lo ni tawh a, Ukraine-a Vernadsky Research-in an chhinchhiahnaah 8.7°C a kai.
El Niño hi a insiam chak zel hmel a, heti a nih chuan khawvel hmar lam, nipui hmang mek ramah lum ber tum a thleng zui zel dawn niin a lang.