Aizawl: PHE department chuan nimin khan Vanapa Hall-ah Aizawl khawpui chhunga tui sem tihchangtlun dan tur zirhona an buatsaih a, khuallian, Deputy Chief Minister Tawnluia’n mipuiten tuihna humhalh kawngah tan an lak nasat a tul tawh hle tih a sawi.
PHE department enkawltu minister, Tawna chuan khawpui liante tui pek chungchangah tui lakna hnar a that tawk tawh loh avangin harsatna a thleng thin a, tui in turah harsatna an thlen zel loh nan tuihna humhalh kawngah mi tin an tan tlan a tul takzet tawh tih a sawi.
Tawna chuan thingtlang khua zawng zawngin tui tlan tur thianghlim leh hrisel an neih theih nan sorkar laipui ruahmannaa hmalak mek a nih thu sawi bawkin, Jal Jeevan Mission (JJM) hnuaiah tui connection 1,33,060 chuang pek tur target awmah connection pek tawh 1,18,500 an awm tawh a, la hmabak vel chu kumin December thla ral hmain pek zawh an tum tih a sawi.
He huna khualzahawm, PHE Secretary Er. C. Lalremsiama chuan Aizawl khawpuia cheng mipuite hnenah service tha zawka tui pek an duh avanga workshop hi buatsaih an nih thu a sawi a, Aizawl chawm zo khawp tui an la pump theih rih lo thu te, SIPMIU hmalakna chu a hlawhtlin chuan reilo teah Aizawl hnianghnar taka chawm thei tur tui an pump thei dawn tih a sawi.
Workshop on Water Management for Aizawl City – Status, Challenges & Way Forward hi hun 4 ah then niin, thupui hrang hrang, ‘Tui sem chungchang’ te, ‘Tui connection pek, pipe fit leh repair chungchang’ te, ‘Water meter reading lak leh tui bill chungchang’ leh ‘Tui tihthianghlim, thawktute leh mipuite inlaichinna chungchang’ te zirho a ni.
He huna an tar lan danin Aizawl khawpui bikah hian PHE Dept. hnuaiah tui semtu mi 433 leh tui pump-tu mi 79 an awm mek a ni.