Mipa tennis a world number one ni lai Spamnish star Carlos Alcaraz chuan Wimbeldon-ah hnehna nen bul a tan a. Champion thei tura rin hlawh zinga tel hian hnehna chan a harsat lo.
Thawhlehni zanah kum 20 mi Alcaraz hian veteran Jeremy Chardy 6-0 6-2 7-5 in a hneh a. Wimbledon chanchin a men’s singles title la thei naupang ber pathumna nih tumin bul a tan.
Alcaraz hian kum 36 mi, Wimbledon zawha professional tennis khelh chawlhsan tum tawh French mi lakah hian a kheltha viau a. Game sarih chauh hlohin darkar hnih tling lovah hnehna a chang.
Thawhlehni a inkhel hi ruahin a tihbuai tam zawk zinga khelh zawh theih tlemte awm a ni a. Centre Court leh Court One-ah bak inkhelh theih a ni lo.
US Open champion lai Alcaraz chuan tunhnaiah che tha viau mahse chhuanthar zinga player tha ber nia a inngaih loh thu a sawi.
“Ka rualpui zingah player tha tak tak an awm. Anni nen hian kan la inel dawn chauh a, hun ropui tak tak kan la tawng ho dawn a ni.”
“Kei hi kan zingah a tha berah ka inngai lo. Jannik Sinner pawh a awm a, Holger Rune pawh a awm. Rune nen kan inkhelhin ka hneh lova, Jannik nen inkhel hautak tak tak pawh kan lo khel tawh thin.” tiin a sawi bawk.
Hmeichhe inkhel lamah champion lai Elena Rybakina chuan bul tan tha lo mahse a tawp a khar tha a. Shelby Rogers lakah 4-6 6-1 6-2 in hnehna a chang.
Ons Jabeur leh Aryna Sabalenka te straight set in an chak ve bawk.