Aizawl: Mizo Hmeichhe Insuikhawm Pawl (MHIP) Day vawi 49-na chu nimin Mizoram pumah kawng hrang hranga lawm a ni.
He ni hi branch hrang hrangte chuan an remchan dan angin an hmang hlawm a, branch tam zawk chuan chhun lamah he ni pual hian inkhawm buatsaihin intihhlimna hunte an hmang a. He ni puala vantlang hmun thenfai hnatlang nei te, damdawi in hrang hranga damlte tana ei tur sem te, an branch member-te hnena tanpuina pete pawh an awm a ni.
MHIP hi July 6, 1974 khan Society Act, 1860 hnuaiah inziak luta din a ni a, Treasury Square, Aizawlah hqrs. neiin hmeichhiate hamthatna tur leh khawtlang tana thil tha tur tiin chak takin an ding zel a, tunah hian MHIP Sub headquarters 10, block 26, joint MHIP 19 leh Branch 758 a awm a, member 2,80,000 vel an awm mek a ni.
MHIP General Headquarters President Ngurmawii Sailo chuan Tachhip, Khatla, Dawrpui leh Bawngkawn MHIP Branch-in MHIP Day an lawmna a hmanpui a, heng hmunahte hian thu sawiin MHIP chu kohhran pawl bik awm lo, neitu bik awm lo, Mizo hmeichhia zawng zawngte lenna hmun a nih thu a sawi a, MHIP a vul zual zela a chak zel chu Mizo hnam tan a pawimawh tak zet tih a sawi.
Ngurmawii Sailo chuan MHIP member-te chu fa neih tam chungchangah tan laa Mizo hnam a pun zel nana fa neih tam an tu leh fate zirtir uar turin a chah a, ruihhlo do kawngah te, thalaite hriselna tichhetu gutkha product do kawngah te tan la zel tur te, hmeichhe naupang ven him kawngah te pawh tan la turin a chah a ni.
MHIP general headquarters hruaitu dangte pawhin hmun hrang hranga MHIP Day lawmna an hmanpui a, General Secretary Lalliana’n anmahni branch, Khatlaah a hmanpui a, Treasurer K Lalliantluangi’n Thanglailung Branch a hmanpui a, OB dangte pawhin branch thenkhat lawmna an hmanpui bawk a ni.