Aizawl: Chief Minister Zoramthanga chuan nimin khan Zemabawk North leh Thuampui venga MHIP Day vawi 49-na lawmnaah khuallian niin a hmanpui.
Zoramthanga chuan MHIP member-te chu inchhung enkawltu pawimawh an nih avangin khawtlang nunah pawh an pawimawh thu a sawi a. Chhungkaw nun tha chuan society tha hringin, chu chuan ram nuam a hring chhawng leh tih a sawi a. Chhungkaw inrelbawl naah mipa an pawimawh ang bawkin nu an pawimawh tak zet thu a sawi.
Zoramthanga chuan tun lai khawtlang nunah chhung tin deuhthaw tibuaitu, zu leh ruihhlo do kawngah theihtawpin sorkar leh khawtlang, tlawmngai pawlte leh kohhran ang zawngte-in tan la nasa viau a. Chutihlai chuan do hneh dan awlsam ber chu heng thil mamawhna a awm loh hi a ni tiin, mahni chhungkua theuhah bultan pawimawh a tih thu sawiin, “Theihtawp chhuahin sorkar pawhin ruihhlo do hna chu a thawk zawm zel ang a; mahse, mi tin mawhphurhna a ni tel tih ka hriat tlan pawimawh,” a ti.
MHIP Day pual hian chief minister chuan a bial chhunga MHIP branch hrang hrangte hnenah lawmpuina pawisafai a pe bawk.