Aizawl Ainawn Venga sorkar quarters luahtuten sorkarin ni 60 chhunga an awmna hmun chhuahsan tura thupek a chhuah chu sut leh turin Chief Minister Zoramthanga an ngen.
Government Allottee Welfare chuan Thawhlehni khan chief minister hnenah hian ngenna lehkha an theh lut a, an lehkhaah chuan sorkar quarters luahtute ni 60 chhunga an chenna chhuahsan tura thupek a chhuah chu July 15 hma ngeia sut leh an duh thu te, mihring chenna tlak loh khawpa quarters chhia leh hlauhawmte chu a rang thei ang bera thiaha a hmun ngaiah sak that leh nghal an duh thu leh quarters hmun hmate hi mi mal in saten an nek chep zel loh nan humhalh tlat an duh thu an tar lang.
Hemi chungchanga The Zozam Times zawhna chhangin Government Allottee Welfare Chairman Vanlalthlana chuan quarters thiah ngai tlem tê a awm avanga quarters la tha tak takte thiah nghal tuma in sawia an chenna hmun ni 60 chhunga chhuahsan tura thupek khauh sorkarin a siam chu hriatthiam harsa an tih thu sawiin, July 3 zana quarters luahtute kalkhawm chuan resolution siamin chief minister hnenah ngenna an thlen ta tih a sawi.
Vanlalthlana chuan sorkar thupek chu zawm tum mah se chhungkaw tam takin in luah tur an hmu mai lo a, an mangang hle tih a sawi a, ni 60 a liam hnuah phei chuan khawlaiah an vakvai mai ang tih pawh a hlauhawm ta tih a sawi a ni.
Government Allottee Welfare Vice Chairman K Vanlalngaia chuan nikum khan sorkar hotute ruahmannain a kaihnawih department hotute, local council hruaitute nen sorkar quarters-a cheng mekte sawn chhuah dan tur hi ruahmanna siam tlan a ni tawh tih a sawi a; mahse, an ruahman angin sorkar a kal lo a, thu dang an nei leh ta tih a sawi.
An thutkhawma an rorel dan chuan quarters-a awm insawn chhuahna tur quarter 200 chu PWD-in an ngaihtuah ang a, quarter 100 dang chu MINECO hmunah ruahman tur a nih tih a sawi a, Ainawn quarters-a awm mek, Aizawl pawna in leh lo neite chu an home district-a transfer tur a ni a, in sa laite chu sum lamah harsatna an nei a nih chuan GPF sorkarin ngaihtuahsak rawh se tihte a nih thu sawiin, hetianga an thu pawm tlan hi sut a ni ta tih a sawi.
Tar lan tawh thin angin GAD chuan June 22 khan vacation notice tichhuakin Ainawn venga sorkar quarter-te chu mipui him tlan nan thiah rawtna a awm avangin May 18, 2023-a council of minister thukhawmin building rawih tawh tak avanga chhiatrupna thleng thut thei pumpelh nan building chu thiah nghal nise tia thutlukna siam a ni tih tar langin, hemi bawhzui hian quarter-a chengte chu ni 60 chunga an chenna tiruak tura hriattir an nih thu tar lan a ni.