India-a court chuan kum li kal taa Muslim pa an sawisa hlumtu mipa 10-te chu kum 10 chhung lung in tang turin a hrem.
Kum 24 mi, Tabrez Ansari-a hi kum li kal ta khan Jharkhand-ah motorcycle rua puh niin nasa taka sawisak a ni a, a hnuah a thi.
Video darha a lan dan chuan Ansari-a hian khawngaih a dil mawlh mawlh laiin Hindu pathiante fakna thu chham tura tihluih a ni a, India ram pumah a laka mite chet dan hian dem a hlawh hle a ni.
A chhungte chuan hliam nasa tak a tawrh chu police hian an ngaihsak lo va, an enkawl tha duh lo niin an sawi bawk.
State police erawh chuan chutiang a nih loh thu leh thil dik loh tih an neih loh thu an sawi.
June 19, 2019-a thil thlengah hian video-a a lan dan chuan Ansari-a hi electric banah phuar beh niin mipuiin an sawisa a, a hmaiah thisen leh mittui a luang nasa hle.
A sawisatute hian ‘Jai Shri Ram’ tia au turin an tilui a, hei hi ‘Lord Ram fakin awm rawh se’ tihna emaw, ‘Lord Ram-a hnenah hnehna awm rawh se’ tihna emaw a ni.
Ansari-a hian zankhuain an sawisa niin a sawi a. A tukah police hnenah hlan a ni a, thil rua puha man zui a ni a. A chhungte hmuh pawh an phalsak lo niin a sawi.
June 22 khan Ansari-a hi a lu a hai a, a luak a, a awm a na a ti bawk a, damdawi inah hruai nghal a ni a, a thi zui ta a ni.
Kar hmasa khan trial court Judge Amit Shekhar chuan mipa 10 chu Ansari-a laka an chet dan avangin thiam loh a lo chantir tawh.
A tirah police hian tualthah thubuai an siam lo va, hei hian sawi pawh a hlawh hle a. A hnuah siam tha lehin puhna dang pawh an belh tel zui leh a ni.
Judge chuan thil thleng chhuina enin tualthattu an ni tih fiahna a tha tawk a ti.