Superstar rual la khawm a hlawhtlinna neih an tum an ti fuh thei lova, hei vang hian Paris Saint-Germain in an kalphung an tidanglam. Team tha din an tum.
Manager Christophe Galtier banin Luis Enrique chu Nilaini zan khan head coach atan an lalut fel. Spain coach hlui hnuaiah hian team thar din an tum.
Club president Nasser Al-Khelaifi chuan Enrique an lakluhna chuan, “Bung thar, kalphung thar a rawn keng tel ang.” tiin a sawi.
Player lakluh lamah pawh an kalphung an thlak danglam. Khawvela player manto ber ni tura Neymar an lakluh hnuah sum tam tak nen Lionel Messi an sawm chhuak. Star player rual an khelhtir a, a fuh thei chuang lo.
Tunah erawh team tha leh nghet, awmze neiin rem an tum. Player bazarah an tawngpawng chet lova, man lovin player tha pahnih an lalut.
European football a defender ngaihven hlawh ber pawl Milan Skriniar chu Inter Milan atangin free transfer in an lalut.
Slovakia international hian kum nga contract a ziak a. Kum 2020-21 a Serie A title a lakpui Inter tan kum nga a khelh hnuah Paris lam a pan.
Kum 28 mi hi Liverpool leh Tottenham Hotspur te pawhin lakluh tumin an ngaihven a, mahse Paris lam pan a thlang zawk.
“PSG hi player tha awmna, fans tha tak nei an ni a, anni ka zawm thei hi ka lawm.” a ti.
Ani bakah hian Real Madrid atangin Spanish attacking midfielder Marco Asensio pawh free transfer in an lalut fel.
Kum 27 mi hian kum thum contract a ziak a, Paris-ah hian Spain team a a lo thawhpui tawh Enrique hnuaiah a khel dawn a ni.
Midfield a chhawr theihna ngah Asensio hian kum 2014 khan Real Madrid a zawm a, an tan vawi 286 inkhelin goal 61 a khung.
Khawvela midfielder beiseiawm ber a nihlaiin kum 2019 khan a khup hliam avangin rei tak a chawl a, a kir leh hnuah che chhe lo mahse Real team-ah hmun nghet a chang thei tawh lo.