Hmeichhe world number one Iga Swiatek chuan a Wimbledon title hmasa ber lak tumin vung takin ke a pen a. Sara Sorribes Tormo chu Centre Court-ah a thunun.
Kum 22 mi hian Nilaini zan khan 6-2 6-0 in a khingpui hi a hneh a, round thumna awlsam takin a lut.
All England Club-ah hian Polish star hian fourth round aia sang a la khel ngai lova, nimahsela tun tumah champion thei tur zinga ngaihah a hming a ri ring.
Swiatek hian round hmasa berah world number 34 Zhu Lin hmachhawnin he inkhelah hian game li chiah a hloh a. A inkhel vawi hnihnaah pawh a aia nasa in a khingpui a thunun.
Grand Slam title vawi li la tawh Swiatek hian grass court-ah hma a sawn nan tunhnaiah a insawrbing zual a. Kar hmasa khan Germany-ah Wimbledon inbuatsaihna tournament ah semi-final a lut tawh.
“Inrintawkna lian tak ka nei a, Wimbledon-ah hian ka nei fo ngai lo. Kumin hi han insiamrem zung zung thei tura ka inpeih ber tumah ka ngai. Ka hmalam hunah chuan helai hi ka hlawhtlinna hmun a la ni thei ang, mahse thawhrim a ngai.” tiin Swiatek chuan a sawi.
Inkhel dangah world number two thin Anett Kontaveit leh 2017 US Open champion Sloane Stephens te pawhin hnehna an chang.