Aizawl : Govt. Aizawl College, Mualpui Campus-a RUSA 2.0 sum Rs. 1,60,00,000 senga sak Boys’ & Women’s Hostel Extension building chu nimin khan Higher & Technical Education Minister Dr. R. Lalthangli- ana’n a hawng.
Hostel building thar hawnna inkhawm GAC Principal Lalbiakzuala kaihhruaiah H&TE Minister chuan Govt. College zingah kumin B.A. result Arts stream-ah Govt. Aizawl College chu pass percentage nei tha ber a nih vangin a lawmpui thu a sawi a. Student enrolment sang ber pahnihna an nih avang leh campus tha tak an nei chhoh mek avanga a lawmpui thu a sawi bawk.
NAAC Accreditation-ah Mizoram chu rampumah Higher Education Institutions-ah pakhatna a hauh thei chu a lawmawmin a chhuanawm hle tih H&TE Minister chuan a sawi a. AISHE report (2020-2021) ah Mizoram chuan 71% a hmuh laiin kumin July thlaah chuan 83% ah kaisangin rampum NAAC Accreditation-ah titha ber a ni ta tih a sawi.
Mizorama College 19-te chuan NAAC hnuaiah ‘valid accreditation’ an neih mek thu leh College 4-te chu accreditation validity a tawp hman thu a sawi a. Mizoramah UGC hnuaiah recognised college 23 a awm mek tih sawiin, chutih rualin insiamthatna tur leh hmasawnna tur kawng tam tak a la awm tih a sawi bawk.