AIZAWL: Rs. nuai 465 senga Lengpuia ran chaw siamna hmun tur sakna tur lungphum chu Vety Minister Er Lalrinawma’n nimin khan a phum.
Lungphumna inkhawmah thu sawiin Er Lalrinawma chuan Mizoramah ran vulh a hautak chhan chu ran chaw man a san thin vang a nih thu leh chumi tihziaawm nana ran chaw siamna hmun tur sak a ni tur chu lawmawm a tih thu leh he project buaipuitu department-a thawktute chungah lawm thu a sawi.
Mizoram sorkarin SEDP hnuaiah ran vulh a ngaih pawimawh thu te, SEDP hnuaia tanpuina pek tam ber an nih hial thute a sawi a. Ran vulhtuten an ran vulhte a hrisel theih nana theihtawp chhuaha an enkawl that a pawimawh thu sawi bawkin, “Tunlaia ran natnate 70% chu mihringin an kai theih avangin an hrisel a pawimawh,” a ti.
Lungphum phumna inkhawm, Rainbow Holiday Home, Lengpui-a neih hi Vety Secretary Lalzarmawii’n a kaihruai a, khualzahawm pahnih, Er. H. Lalzirliana, MLA leh C. Lalmuanpuia, MLA ten thu an sawi bawk.
Ran chaw siamna hmun tur, ‘Sustainable Animal Feed Distribution System to Check Inflation of Meat & its End Products Project’ hi Rs. nuai 465 senna tur a ni a, ran chaw siamna hmunah hian Feed Godown Phase I, II & III, Digital Weighing Bridge, Manager Quarters cum Site office, Labour Shed bakah Bio-Security Fencing te awm tura ruahman a ni.
He project hian a tum ber chu ran vulhtuten man tlawm zawka ran chaw an lei theihna tur kawng hawnsak te, engtiklai pawha ran chaw tha leh man tlawm lei tur awmtir reng te, ran chaw chawk luhna man tihniam tura Sairang/Sihhmui rail station hnaia feed godown din a nih bakah company lian zawk hnen atanga tum khata ran chaw tam tak lakluh theihna kawng sial te a ni.