India state zingah ni khata Covid-19 kai hmuh chhuah tam ber nihna a hauh mek laiin Kerala-ah mi 14-in Zika virus an kai tih hmuh chhuah a ni.
Dengue anga thosi atanga inkaidarh theih natna hi ni hnih chhungin chhim lam state-ah hian a kai hmuh chhuah an ni.
Ningani khan Kerala-a Thiruvananthapuram vengah kum 24 mi nau paiin Zika hi a kai a ni tih hmuh a nih atangin a darh mek zel.
Mi 14-in an kai tih hriat a ni tawh a, mi dangte hi National Institute of Virology-a sample thawn hnua kai tih hriat an ni.
“Kan department chu he thilah hian kan inralrin mek bakah nasa takin kan chhui zui hna kan thawk mek a. Covid chungchangah pawh inenkawlna indaih thei tur ang berin hma kan la mek. Kerala-ah oxygen tlakchham vangin tun thlengin nunna chân an la awm lo,” tiin Health Minister Veena George chuan a sawi.
Sorkar laipui atang pawhin mi thiam rualte chu state sorkar pui turin a thleng tawh.
Union Health Ministry Joint Secretary Lav Agarwal chuan New Delhi-a thuthar lakhawmtute hmaah mi paruk awmna team chu Kerala sorkar pui tura tirh an nih thu a sawi a. AIIMS atanga mi thiam rualte an ni tih a sawi bawk.