Madhya Pradesh, India-ah national park-ah cheetah pakhat a thih belh leh a, zawhte lian chi hi an lak luh thar leh hnuah pasarih an thi ta.
Kuno National Park-a hotu pakhat chuan cheetah thi thar leh hi anmahni insual vang a nih a rinawm thu a sawi.
Thi hi a pa, Tejas tia a hming an sak a ni a, hliam a nei nual niin an sawi.
India-ah hian cheetah hi kum 1952 atang khan a mang a, nikum khan awm thartir leh tumin ram dang atangin an chaw lut a ni.
September, 2022 khan Namibia atangin cheetah pariat lak luh a ni a, February khan South Africa atangin 12 lak luh belh an ni bawk.
Heng zinga pathum hi thla hnih kal ta chhung khan a thi a. March thlaa Kuno-a a no piang zinga pathum chu May khan an thi bawk.
Cheetah note hi an chak lo hle a, an nih tur ang aiin an zâng a, tui an pai tlem hle niin park thuneitute chuan an sawi a. A puitling thi erawh chu chhan hrang hrang vang niin thenkhat chu kal na avang leh an insualna atangin a ni.
India-a cheetah awmtir thar leh tur hi Prime Minister Narendra Modi-a’n hawngin nasa taka lawm a ni a. Wildlife lama mi thiamte pawh an lawm hle a, hetih rual hian hetiang ramsa hi an awm hmun sawn hi a risk a sang hle a, sa pelh tur an baihvai mai ang tih pawh an hlauhpui bawk.
Supreme Court pawhin May thla khan cheetah thi chungchang hi ngaihtuahin sorkar laipui chu an awm hmun tha zawk sawn mai turin a lo rawtsak tawh.
Cheetah hi India-ah chuan ransa ngaihhlut tak niin an thawnthu hlui tam takah pawh a lang a; mahse, kum 1947-a an indan hnuah an pel nasa a, an chenna hmun tihchhiatsak an ni a, sa dang pelh tur an nei tam tawk tak bawk loh avangin an mang zui ta a ni.