- Ruata
Hmanni lawk khan Maruti Suzuki chuan NEXA showroom atanga hralhchhuah turin crossover thar Fronx an tlangzarh a. Tunah hian he lirthei hi gas (CNG) hmang an tlangzarh veleh ta a, hei pawh hi NEXA atanga hralhchhuah tho tur a ni.
Maruti Suzuki Fronx CNG hi chi hnih a awm ang a, hengte hi Sigma leh Delta a ni dawn a. Rs. Nuai 8.41 man atangin a intan ang a, Rs. Nuai 9.27 man thlengin a awm ang a. A man tarlan hi ex-showroom man a ni a. Heti hian a man hi petrol hmang Fronx aiin Rs. 93,500 velin a to hret dawn tihna a ni.
A khawl
Maruti Suzuki Fronx CNG hian 1.2-litre K-Series DualJet, Dual VVT engine tho a hmang ang a, factory-fitted CNG kit a keng tel thung ang a, petrol aiah gas a hmang thung dawn tihna a ni. Gas hmang ho hi petrol hmang aiin a chak lo hret thin a, Fronx CNG hmang hian 77.5PS power chu 6000rpm-ah a pechhuak thei a, a peak torque 98.5Nm chu 4,300rpm-ah a pechhuak thei thung a ni. Transmission lamah chuan 5-speed manual gearbox a hmang a. CNG version hian petrol nena khaikhin chuan tui a heh loin a hautak lo bik hle a, 28.51 km/kg a tlan thei a ni. Petrol khawl zawkah hi chuan 89bhp power chu 6,000rpm-ah a pechhuak thei a, 113Nm torque chu 4,400rpm-ah a pechhuak thei bawk a ni.
Maruti ho CNG lirthei pun belh zel
Maruti Suzuki hian an lirthei petrol hmang chhuak mek hi CNG hmangin an tichhuak nual tawh a, Fronx-a CNG hmang a chhuak leh a nih chuan an CNG hmang lirthei model 15-na chiah a ni ta a ni.
Kentel hrang hrang
A man tlawm lam Sigma variant hian thil hrang hrang – halogen projector headlamp, keyless entry & go, automatic AC, fabric seat upholstery, hill hold assist, ESP, reverse parking sensors, dual airbags leh rear defogger te a nei a. Delta variant hian ORVM-a turn indicator awm, 7-inch touchscreen infotainment with wireless Apple CarPlay & Android Auto, voice assist features, OTA updates, 4-speaker sound system, electrically adjustable wing mirrors, steering wheel-mounted controls leh adangte a nei tel thung a ni.
Maruti Suzuki hotute lam
FRONX S-CNG tlangzarhnaah hian Shashank Srivastava, Senior Executive Officer, Marketing & Sales, Maruti Suzuki India Limited chuan thu sawiin Fronx thar mawi leh langsar takah hian lirthei mawi ngainatute mai bakah chhehvel boruak tha siam lam veitute tan duhthlan tur a siam dawn a ni a ti a. Maruti Suzuki Fronx chuan Auto Expo-a an phochhuah tirh phat atangin duhtu leh ngainatu, mawi titu a ngah hle a ni a ti a, a khawl leh tunlai thiam hrang hrang a kentel chu a chhuanawm em em a ni a ti bawk.
Maruti Suzuki mai bakah hian India ram chhunga lirthei siamtu company dangte pawhin an lirtheite hi CNG hmangin an tichhuak nual hlawm a. A bik takin phai lamah hian CNG hmang hian tui a heh loh avang leh a hautak loh avangin duhtu leh leitu a ngah hle a. India ramah chuan CNG hmang hi lirthei tharah pawh an la dah tel chhoh zel a beiseiawm a ni.