Afghan sorkar chuan Taliban-ten an khawpui liante lak tuma an beih mek tihthuanawp nan ram pumah thla khat awh tur curfew chu Inrinni khan an kalpui tan.
An khawpui, Kabul bakah province dang pahnihah zan dar 10:00 leh a tuk zing dar 4:00 inkarah veivah phal a ni lo.
Taliban leh Afghan sorkar sipaite hi ram dang sipaite an inthiar chhuah mek laiin, thla hnih liam ta atang khan an inbei nasa hle.
Hel pawl hian an ram zahve vel chu an la leh tawh nia hriat a ni.
United States an insaseng mek lai hian ramri khaw pawimawh tak tak lain thingtlang hmun tam takah ram an zauh leh tawh.
BBC chuan remna zawnga inbiakna a kal muang si a, indona hi mihring chen tamna, khawpui lianah pawh a thlen zui zel a rinawm thu a tar lang.
Islamist hel pawl, Taliban hi kum 20 dawn liam taa US-in Afghanistan-a an thuneihna a paih thlak hnuah intilian thar lehin khawpui lian kalpawhna kawngpui pawh an thunun nual tawh.
An indo mite chuan khawpui liante an hnaih zel a, lak tak erawh an la nei lo.
Interior ministry chuan curfew puan hi tharum thawhna thleng leh Taliban che vel dan nan a nih thu leh Kabul, Panjshir leh Nangarhar chu telh rih loh a nih thu a sawi.
Taliban hian hma an sawn zel a nih chuan tun kar chhung hian Kandahar khawpui dai an thlen hman tawh ngei rin a ni.
US chuan Ningani khan Kandahar chhehvela helho hmunte chu thlawhna atangin a kap a; mahse, August 31-ah Afghanistan hi an chhuahsan fel dawn avangin rei an inrawlh tawh lo vang.
US kaihhruai tangrual sipaite hian Taliban hi Afghanistan-a an thuneihna atangin October, 2001 khan an paih thla a. An pawl hi 9/11 beihnaa bultumtu, Osama Bin Laden leh mi dangte inhumhimna nia ngaih a ni.