• Ruata

India rama company hlun leh SUV siamchhuaktu lar, Mahindra chuan an sub-4 meter SUV hmingthang XUV 300 chu tunah hian an duang chho mek a, khawlaiah pawh enchhin lai hmuh tur a awm leh mek a. Kum 2024-ah an hralhchhuah hman beisei a ni a, a changkang dawn viau a ni.

Tunhnaiah SUV huang hi lirthei hralh kal ber huang a ni mek a. XUV 300 te awmna huang, sub-4 meter/compact SUV huanga lirthei hrang hrang chu Hyundai Venue, Kia Sonet, Maruti Suzuki Brezza, Tata Nexon te a ni tih kan hre theuh a. Heng ho hi tunhnaia kan khawlai luahtu lirthei tam ber te zinga mi a ni a tih theih awm e. Heng company dangte pawh hian an SUV ho hi an tuaithar loh leh a chi thar an tichhuak chho mek bawk a. Hetih karah hian Mahindra compact SUV changkang leh mawi tak mai XUV 300 chu a thar tichhuak turin company lam pawh an inpuahchah mek a, nakum lamah lei theih tura tlangzarh tak erawh hi chu an tih hman beisei a ni.

Thil thar eng nge kan hmuh dawn?

Tunhnaia lirthei changkang chhuak hoin an neih tlangpui tawh leh duhthlan theihna an neih tlangpui tawh chu sunroof a ni a. He lirtheiah pawh hian a awm tawh thin a. XUV 300 rawn chhuak thar turah hian midsize SUV changkang hoa kan hmuh ang sunroof lian chi panoramic sunroof kan hmu dawn a. Sunroof la hrechiang lutuk lo tan chuan a chung hawn theih tihna a ni. An tlangzarh hunah chuan panoramic sunroof hi he compact SUV huanga nei awmchhun tur hi tun dinhmunah chuan a ni dawn a. A huanga a elpui dang, nei an la awm rih lo a ni. Lirtheiah hian sunroof nei hi lirthei leituten an duh viau mai a, tuna duhthlan theih nei lirthei model-ah chuan sunroof nei hi an lei nasa hle a, India ramah chuan a lar chho viau a. He SUV thar tur hralh kawngah pawh hian nasa takin a puih beisei a ni.

XUV 300 mai bakah hian Mahindra chuan all-electric XUV400 thar lo awm turah panoramic sunroof hi an dah ve hmel bawk a, hei erawh hi chu XUV 300 thar chhuah hnua la chhuak tur a ni. Thil thar dangah chuan XUV 300 hian a landanah pawh a hma leh hnung bawrah design chi thar a rawn pu dawn a. Healdlamp, taillamp, bumper leh thil hrang hrang hi design thar diai a rawn nei dawn a, an XUV.e concept nghahchhana duan a ni dawn a, a hma aiin a lang changkangin a lang tunlai zual hle dawn a ni.

A chhhung lamah pawh hian tunlai hmanraw changkang hrang hrang kan hmu leh nual ang a. Mahindra XUV 300 hi a elpui zingah chuan tuna chhuak mek pawh hi kentel hrang hrang nghah, lirthei changkang leh tunlai em em mai a ni sa a. Hetah hian thil thar tha tak tak an rawn la belh leh dawn bawk a, a changkang viau dawn a. A chhung lan dan leh siamphung pawh hi tuna chhuak hi chu a lo rei leh ta deuh a, tunhnaiah lirthei thar leh design thar a lo chhuak tam tawh nen tlemin a lang hlui ve ta deuh hlek a, hetah pawh hian design thar changkang tak kan hmu dawn niin media report hrang hrangte chuan an tarlang bawk a ni.

Khawl ngai a hman beisei

A khawl lamah chuan company lamin tuna a hman mek hi a la tha tawk an ti aniang e, 110hp power leh 131hp power pechhuak thei, 1.2-litre, three-cylinder turbo-petrol khawl pahnih bakah 117hp power pechhuak thei 1.5-litre diesel khawl hi a la hman chhunzawm hmel a. Transmission lamah pawh a ngai angin a la kal hmel bawk a, an AMT automatic bik hi torque converter automatic-in a rawn thlak maithei tih thawm te a awm a, hei erawh company lamin an rawn la sawichiang ang a. A khawl lam pawh hi official-a company lam atanga puanzar a la ni lo a, chiang zawkin kan hriat thuai te pawh beisei ila.

A man

Mahindra XUV 300 thar tur hi an thawm belhna tur hmanraw hrang hrang ngaihtuahin a to belh hret beisei a ni a. Tuna chhuak mek XUV 300 hi Rs Nuai 8.42 – 14.60 (ex-showroom, India) man a ni mek a ni.