Mizoram Junior basketball team chuan 71st Junior National Basketball Championships-ah group stage an paltlang a. Group E-ah sang ber in Ningani inkhelah Bihar 61-39 in an hneh.
Indore a Junior inelna tournament kal mekah Mizoram hian an inkhel hmasa lamah Andhra Pradesh leh Puducherry te 69-63 leh 88-38 in an hneh tawh a. Bihar lakah hian an dinhmun a that tawh avangin hahdam deuh zawkin hnehna an chang thei.
Quarter hmasa berah point 20 score in Bihar chu 11 chiah an score tir a, a hnu quarter thumah pawh a score hnem zawkah tang zelin an dinhmun tha an thlah lo.
Mizoram tan Nicholas Lalmuanpuia chuan point 13 a score a, Rinmuanpuia Chhangte chuan point 12 score bawkin Emmanual VL Awmpuia leh Moses Lalmuanzova ten point 11 leh 10 an thawh.
Mizoram hi tun tournament-ah hian level 2-ah an awm mek a. Level 2 team te awmna group pali a titha te nen Level 1 qualifying an khel dawn a, vawiin chhun dar 11:30-ah Chandigarh nen an inkhel anga, a chak zawkin tlai dar 6:30-ah Haryana leh Himachal Pradesh a chak zawkte an hmachhawn leh ang.
Mizoram coach Vanlalnunsanga chuan, “State dangte pawhin kan inkhel hmuhnawm an ti a, team skill-ah kan san avangin min fakna tawngkam an nei ve fo thin. Level 2 bikah hi chuan kan intluk tlang a, a tha pawl kan ni ve chuan kan hria a, inrintawkna sang tak kan nei.”
“Champion chu duhthusam a ni a, chutihrualin Level 1 team ni tura kaisan hi kan ngai pawimawh hle.” tiin The Zozam Times a hrilh.