Supreme Court chuan Manipur-a tharum thawhna thlenga CBI-in a chhui thubuaite chu an thenawm, Assam-a ngaihtuah turin a sawn a, Gauhati High Court Chief Justice hnenah judicial officer pakhat emaw, a aia tam emaw hemi atan hian ruat turin a ti nghal bawk.
Chief Justice D Y Chandrachud-a kaihhruai thubuai ngaihtuahtu bench chuan dan bawhchhiaa puhte chungthu, kawl, judicial custody-a dah leh dah hun chhung pawh sei ang chi chu Gauhati-a a ngaihtuahtu tura tih court-ah online hmanga ngaihtuah zel turin a ti a ni.
Bench chuan CBI-in a chhui thubuaia court-a inlan tura tih – thil tihsual tuartu, hriatpuitu leh a dang pawh online-a inlan an duh lo a nih chuan Gauhati court-ah pawh a mah pawh a inlan thei dawn a ni.
Manipur sorkar hnenah hian Gauhati court-a online-a an inlan theihna turin internet service tha pangngai pe ngei turin a ti bawk.
August 21 khan court sang ber hian Justice Gita Mittal committee chu Manipur-a chi leh chi inkara tharum thawhna thleng tuartu puihna leh chhawmdawlna ngaihtuah turin a lo ti tawh.
Manipur-a thil thleng hrang hrang zingah thubuai 10 vel chu CBI chhui tura dah a ni a. Heng zingah hian hmeichhe pahnih, mipat hmeichhiatna hawia khawih, khawlaia saruaka kalpui video darh pawh a tel.
Buaina chhuak avang hian Manipur-a cheng tam tak chuan an lehkha pawimawh (identity document) an tibo nasa hle a. Hei vang hian Supreme Court chuan heng mite tan hian state sorkar leh mi dang, UIDAI te pawh Aadhaar card te siam thar leh tur leh zangnadawmna pek dan ruahman turin a ti bawk.
Hemi ngaihtuahtu panel hian report pathum thehlut tawhin identity document, zangnadawmna tihpun leh thil dang eng emaw a tel.
May 3-a ‘Tribal Solidarity March’ neih atanga Metei leh Kuki intihbuaina chhuakah hian mi 160 chuang thi tawhin mi sang tel baihvaiin an awm tawh a ni.