Aizawl : UD&PA leh Lead Bank tang- kawpin nimin hkan Street Vendors te tana PM Street vendor’s AtmaNirbhar Nidhi (PM SVANidhi) loan puk chungchang inzirtirna Lunglei-ah an buatsaih.
Manager SD&I, DAY-NULM UD&PA Lunglei B.Vanlalhriatpuii’n PM SVANidhi loan chu kum 2021 khan India Prime Minister-in a tlangzarh thu sawiin, Covid-19 leng avangin kum 2024 thleng pawhsei niin, khawlaia nepnawi zuar inpho te leh chawhmeh zuar inpho license nei te tana he scheme hi siam a nih thu leh he scheme hmanga loan la te chu sorkar laipuiin za-a 7 a rulhsak tur thu a sawi.
Chief Manager, SBI Lunglei Lalramnghaki Pachuau,-in India ram hmun hrang hrangah PM SVANidhi loan hmangin mi tam takin ei leh bar zawn kawngah nasa takin hma an sawn tawh thu sawiin, “Mizoramah pawh kan hmel hriat chho ve zel a, a lawmawm hle” a ti a. Lunglei district-ah mi 95 loan vawikhatna la an awm mek thu leh vawihnihna la mi 31 awm mek thu a sawi sawiin, vawithumna la tawh mi 2 an awm mek thu a sawi bawk.
DUDO, UD&PA, Lunglei C. Sawihlira pawhin street vendor kal khawm te chu an vanneih thu sawiin, loan chu mi nazawng pek chi a nih loh thu leh kalkhawm te bank lamin anmahni ngei loan la tura an sawm chu thil lawmawm tak a nih thu a sawi a. Loan lak te a hun taka an rulh chuan a puktirtu bank te tan pawh loan pek leh a chakawm thin avangin loan la te pawh a hun takah a rulh dan tur ang taka rul theuh turin a chah bawk a ni.
Loan camp-ah hian loan la duh nghal te chu State Bank, Apex Bank, Rural Bank ten a hmunah an buaipuisak nghal a, Bank Account nei lo te pawh hawnsak nghal thei turin a hmunah hian Bank te an inchhawp bawk.
Sorkar thuchhuahin a tarlan danin PM SVANihi loan hi vawikhat laknaah Rs 10,000 lak theih niin, vawihnih laknaah Rs 20,000 ah pung chhovin vawi thum laknaah Rs 50,000 lak theih a ni.