Mipa tennis a Grand Slam final khel ve ve tawh, world rankings a number 7 leh number 5 ni lai Tsitsipas leh Casper Ruud te chu US Open a mipa lam inelna a second round paltlang zo lo langsar an ni a. Nilaini zanah an tlawm ve ve.
Flushing Meadows a seeded number 7 nihna changtu Tsitsipas hian Swiss qualifier Dominic Stricker chu 7-5 6-7 (2-7) 6-7 (5-7) 7-6 (8-6) 6-3 in a hneh lo.
Kum 21 mi Stricker hi US Open a khelh vawikhatna a ni a, a tawnhriat la tam lo mahse Tsitsipas lakah a zam lova, inrintawkna sang tak neiin tihsual a nei tam lo.
A rilru paukhauhna hi Stricker hian a chakpui a, a game ‘cool’ tak chu Tistsipas-a’n a nawr viau pawhin a chhawr tangkai hle.
“Set khatna hnuah khan ka tlangnel nual a, zamna leh hlauhthawnna ka nei lo. Inkhel hautak tak a ni a, a chak zawk ka ni hi ka tlawm hle.”
“Tun dinhmunah inrintawkna sang tak ka nei a, ka theihna ka hrechiang a, thui tak ka kal thei tih hi ka inhria.” tiin a sawi.
Tsitsipas hi New York a inelnaah hian a thleng thui mawh viau a, round thumna aia sang a la lut ngai lo.
Ani bakah nikum a final khel Casper Ruud chuan 6-4 5-7 6-2 0-6 6-2 in world number 67 Zhang Zhizhen a hneh lo.
World number 5 ni lai Ruud hi a tlawm avang hian seeded number two hauhtu Novak Djokovic-a chan a tha chiah a. 6-4 6-1 6-1 a ernabe Zapata Miralles hnehtu hian Tsitsipas leh Ruud te bakah seeded number 4 Holger Rune a tlak tawh avangin quarter-final thleng a kalkawngah khingpui hautak ni thei tura ngaih an tlem sawt dawn a. Round of 16-ah Laslo Djere a hmachhawn leh ang.
“New York a inkhelh leh hi nuam ka ti em em a, hei hian chakna min pe in ka hria. Tun aia tha hian ka la khel leh thei a ni tih ka inhria.” tiin a sawi.
Inkhel dangah tualchhung mi seeded number 9 Taylor Fritz chuan Juan Pablo Varillas chu 6-1 6-2 6-2 in a hneh.